نئی دہلی، 3 اگست (ہ س)۔ صدر جمہوریہ ہنددروپدی مرمو سے پیر کو راشٹرپتی بھون میں ازبکستان کے وزیر خارجہ سعیدوف بختیار اودیلووچ نے ملاقات کی۔ اس موقع پر دونوں رہنماؤں نے بھارت اور ازبکستان کے درمیان دوطرفہ تعلقات کو مزید مضبوط بنانے اور تجارت، سرمایہ کاری، کان کنی، زراعت، دواسازی اور اطلاعاتی ٹیکنالوجی سمیت مختلف شعبوں میں تعاون بڑھانے پر تبادلہ خیال کیا۔

صدرجمہوریہ ہند مرمو نے ازبکستان کے وزیر خارجہ اور ان کے وفد کا خیر مقدم کرتے ہوئے کہا کہ بھارت اور ازبکستان کے درمیان قدیم تجارتی راستوں سے جڑے گہرے تاریخی، ثقافتی اور تہذیبی تعلقات موجود ہیں۔ انہوں نے کہا کہ فنِ تعمیر، زبان، کھانوں، موسیقی اور مذہبی روایات کی مشترکہ وراثت نے دونوں ممالک کی شراکت داری کو مزید مضبوط بنایا ہے۔

انہوں نے کہا کہ ازبکستان کے اعلیٰ سطحی وفد کا دورہ بھارت اور اس کے ساتھ منعقد ہونے والا بھارت۔ازبکستان بزنس فورم اس بات کا مظہر ہے کہ دونوں ممالک کی کاروباری برادریوں کا ایک دوسرے کی منڈیوں پر اعتماد مسلسل بڑھ رہا ہے۔ صدر نے نایاب معدنیات (ریئر ارتھ منرلز)، زراعت، دواسازی اور اطلاعاتی ٹیکنالوجی جیسے شعبوں میں تعاون کے وسیع امکانات کا بھی ذکر کیا۔

صدرجمہوریہ ہند مرمو نے بتایا کہ بھارت کے آئی ٹی ای سی تربیتی پروگرام اور دیگر وظائف سے اب تک ازبکستان کے تین ہزار سے زائد سرکاری افسران، پیشہ ور افراد اور طلبہ مستفید ہو چکے ہیں۔ انہوں نے یہ بھی کہا کہ اس وقت 16 ہزار سے زیادہ بھارتی طلبہ ازبکستان میں اعلیٰ تعلیم حاصل کر رہے ہیں، جو دونوں ممالک کے درمیان عوامی روابط اور باہمی افہام و تفہیم کو مزید مضبوط بنانے میں اہم کردار ادا کر رہے ہیں۔

ملاقات کے دوران دونوں فریقوں نے اس یقین کا اظہار کیا کہ اس دورے کے دوران ہونے والی بات چیت بھارت اور ازبکستان کے درمیان دوستی، باہمی اعتماد اور تعاون پر مبنی تعلقات کو مزید استحکام بخشے گی۔

ہندوستھان سماچار

ہندوستان سماچار / Mohammad Khan