نئی دہلی، 3 اگست (ہ س)۔ دہلی کی راؤج ایونیو کورٹ نے خواتین پہلوانوں کے مبینہ جنسی ہراسانی کے مقدمے میں بھارتی کشتی فیڈریشن کے سابق صدر اور بھارتیہ جنتا پارٹی(بی جے پی) کے رہنما برج بھوشن شرن سنگھ اور بھارتی کشتی فیڈریشن کے سابق سکریٹری ونود تومر کو پیر کے روز بری کر دیا۔ ایڈیشنل چیف جوڈیشل مجسٹریٹ اشونی پنوار نے دونوں ملزمان کو بری کرنے کا حکم سنایا۔ عدالت نے 2 جولائی کو اس معاملے میں فیصلہ محفوظ کر لیا تھا۔عدالت نے 7 جولائی 2023 کو دہلی پولیس کی جانب سے داخل کی گئی چارج شیٹ کا نوٹس لیا تھا۔ دہلی پولیس نے 15 جون 2023 کو چارج شیٹ داخل کی تھی، جس میں بھارتی تعزیراتِ ہند (آئی پی سی) کی دفعات 354، 354-ڈی، 354-اے اور 506(1) کے تحت الزامات عائد کیے گئے تھے۔ بعد ازاں 10 مئی 2024 کو عدالت نے برج بھوشن شرن سنگھ کے خلاف الزامات طے کرنے کا حکم دیا تھا۔سماعت کے دوران برج بھوشن شرن سنگھ نے ایک درخواست دائر کرتے ہوئے مؤقف اختیار کیا تھا کہ مبینہ واقعے کے دن، یعنی 7 ستمبر 2022 کو، وہ بھارت میں موجود نہیں تھے۔ انہوں نے عدالت سے استدعا کی تھی کہ دہلی پولیس کو اس دعوے کی تحقیقات کا حکم دیا جائے، تاہم عدالت نے ان کی یہ درخواست مسترد کر دی تھی۔ اس سے قبل 20 جولائی 2023 کو عدالت نے برج بھوشن شرن سنگھ اور شریک ملزم ونود تومر کو ضمانت دے دی تھی۔برج بھوشن کے وکیل راجیو موہن نے عدالت میں مؤقف اختیار کیا تھا کہ اوورسائٹ کمیٹی کی رپورٹ مرکزی حکومت نے دہلی پولیس کمشنر کو بھیجی تھی۔ ان کا کہنا تھا کہ اس معاملے میں پہلا احتجاج 18 جنوری 2023 کو جنتر منتر پر ہوا تھا۔ دوسری جانب خواتین پہلوانوں کی نمائندگی کرنے والی وکیل ربیکا جان نے دلیل دی تھی کہ اوورسائٹ کمیٹی قواعد و ضوابط کے مطابق تشکیل نہیں دی گئی تھی۔ انہوں نے یہ بھی کہا تھا کہ جن دفعات کے تحت چارج شیٹ داخل کی گئی ہے، انہی کے مطابق ملزم کے خلاف الزامات بھی طے کیے جانے چاہئیں۔ہندوستھان سماچار

ہندوستان سماچار / Mohammad Khan