پریاگ راج، 29 اگست (ہ س)۔ اتر پردیش کے پریاگ راج ضلع میں واقع شنکر گڑھ تھانہ علاقے کے چکرا جی گڑھوا گاؤں میں جمعہ کی رات نشے کی حالت میں ہوئے تنازع کے بعد ایک نوجوان پر کلہاڑی سے حملہ کرکے اس کا قتل کر دیا گیا۔ واقعے کی اطلاع ملتے ہی پولیس موقع پر پہنچی اور صورتحال کو قابو میں کیا۔ پولیس نے لاش کو پوسٹ مارٹم کے لیے بھیج دیا ہے۔ مقتول کے بھائی کی تحریری شکایت پر پانچ افراد کے خلاف قتل کا مقدمہ درج کرکے ملزمان کی تلاش کی جا رہی ہے۔

اسسٹنٹ کمشنر آف پولیس، بارہ، عبدالاسلام خان نے بتایا کہ جمعہ کی رات شنکر گڑھ تھانہ علاقے کے چکرا جی گڑھوا گاؤں میں دو فریقوں کے درمیان تنازع ہوگیا، جس میں ہیرا لال کول (40) ولد کلّو کول شدید زخمی ہوگیا اور کچھ دیر بعد اس کی موت ہوگئی۔ اطلاع ملنے پر پہنچنے والی پولیس ٹیم نے لاش کو قبضے میں لے کر تفتیش شروع کردی ہے۔ مشتبہ افراد کی تلاش میں پولیس کی ٹیمیں ممکنہ مقامات پر چھاپے مار رہی ہیں۔

اے سی پی بارہ نے بتایا کہ مقتول کے بھائی پھول کمار کی تحریری شکایت پر مننی لال، پپو، منوج، ریکھا اور مرچان کے خلاف قتل کا مقدمہ درج کیا گیا ہے۔

ایک دو ماہ قبل بھی ہیرا لال کا ملزمان سے کسی بات کو لے کر تنازع ہوا تھا۔ ایسے میں پرانی دشمنی کی بات بھی سامنے آ رہی ہے۔ تاہم، واقعے کی اصل وجہ کا پتہ لگانے کے لیے پولیس تمام پہلوؤں سے تفتیش کر رہی ہے۔

ہندوستھان سماچار

---------------

ہندوستان سماچار / عبدالواحد