نیویارک، 29 اگست (ہ س)۔ دنیا کی نمبر ایک خاتون ٹینس کھلاڑی بیلاروس کی آریانا سبالینکا اور امریکی اسٹار جیسیکا پیگولا نے یو ایس اوپن 2026 میں ریکارڈ انعامی رقم اور نئی گرینڈ سلیم پلیئرز ایڈوائزری کونسل کے قیام کا خیرمقدم کیا ہے۔

یو ایس اوپن نے اس سال مجموعی طور پر 10.8 کروڑ ڈالر (تقریباً 900 کروڑ روپے) کی ریکارڈ انعامی رقم کا اعلان کیا ہے۔ اس کے علاوہ چاروں گرینڈ سلیم ٹورنامنٹس نے کھلاڑیوں کو فیصلہ سازی کے عمل میں زیادہ کردار دینے کے لیے ایڈوائزری کونسل تشکیل دینے کے منصوبے کا بھی اعلان کیا ہے۔

سبالینکا نے جمعہ کو صحافیوں سے گفتگو کرتے ہوئے کہا کہ کھلاڑی طویل عرصے سے جس تبدیلی کی امید کر رہے تھے، اب اس کی سمت نظر آنے لگی ہے۔ انہوں نے کہا، ’’ہم بہت خوش ہیں کہ آخرکار ہم اس مقام تک پہنچ رہے ہیں، جہاں ہم ابتدا ہی سے پہنچنا چاہتے تھے۔‘‘

دنیا کی نمبر ایک کھلاڑی نے امید ظاہر کی کہ نئے نظام سے کھلاڑیوں اور ٹورنامنٹ منتظمین کے درمیان کشیدگی کم ہوگی۔ اس سے قبل کھلاڑیوں اور منتظمین کے درمیان اختلافات کے باعث فرنچ اوپن اور ومبلڈن میں کھلاڑیوں نے میڈیا سے بات چیت کا وقت محدود کر دیا تھا۔

سبالینکا نے کہا، ’’امید ہے کہ مستقبل میں ہمیں میڈیا یا کسی ٹورنامنٹ کا بائیکاٹ نہیں کرنا پڑے گا۔ ہم سب خوش رہیں گے اور ابتدا سے ہماری یہی خواہش تھی۔‘‘

اس سال کھلاڑیوں نے میڈیا سے اپنی گفتگو تقریباً 15 منٹ تک محدود رکھی، جو گرینڈ سلیم ٹورنامنٹس کی جانب سے کھلاڑیوں کو انعامی رقم کے طور پر دیے جانے والے تقریباً 15 فیصد آمدنی کے حصے کے خلاف علامتی احتجاج تھا۔

وہیں، پیگولا نے کہا کہ مرد اور خواتین کھلاڑیوں کے متحدہ مطالبات نے پلیئرز ایڈوائزری کونسل کے قیام میں اہم کردار ادا کیا۔ انہوں نے کہا کہ کھلاڑیوں نے مل کر شاندار کام کیا ہے اور گرینڈ سلیم ٹورنامنٹس میں اس طرح کی کونسل کا قیام اس سے پہلے کبھی نہیں ہوا تھا۔

پیگولا نے کہا، ’’کھلاڑیوں نے جو حاصل کیا ہے، وہ شاندار ہے۔ گرینڈ سلیم کے ساتھ کونسل، کھلاڑیوں کی فلاح و بہبود کے لیے تعاون اور انعامی رقم میں ایک اور اضافہ جیسی چیزیں پہلے کبھی نہیں ہوئی تھیں۔‘‘

انہوں نے کہا کہ مرد اور خواتین کھلاڑیوں، خصوصاً ٹاپ کھلاڑیوں کے اتحاد نے گرینڈ سلیم منتظمین پر کھیل کو آگے بڑھانے کے لیے مسلسل دباؤ بنایا۔

تاہم، پیگولا نے واضح کیا کہ کھلاڑیوں کی جدوجہد ابھی ختم نہیں ہوئی ہے۔ انہوں نے کہا کہ کونسل کی ساخت، اس میں شامل ہونے والے ارکان اور اس کے کام کرنے کے طریقہ کار کو لے کر ابھی کافی بات چیت ہونا باقی ہے۔

ہندوستھان سماچار

---------------

ہندوستان سماچار / عبدالواحد