نئی دہلی، 29 اگست (ہ س)۔ بھارتی جونیئر ویمن ہاکی ٹیم ہفتہ کو اے ایچ ایف ویمن جونیئر ایشیا کپ 2026 میں شرکت کے لیے چین کے موکی روانہ ہوگئی۔ ٹورنامنٹ 4 سے 13 ستمبر تک کھیلا جائے گا۔ 18 رکنی بھارتی ٹیم کی کپتانی مڈفیلڈر خیدیم شیلائما چانو کریں گی۔

نومنتخب ہیڈ کوچ ٹم وائٹ کی رہنمائی میں بھارتی ٹیم نے ٹورنامنٹ کی تیاری کے لیے طویل عرصے تک محنت کی ہے۔ ٹیم نے رواں موسم گرما میں برطانیہ کا اہم دورہ بھی کیا، جہاں اسے اعلیٰ سطح کی ٹیموں کے خلاف کھیلنے کا تجربہ حاصل ہوا۔

5 سے 14 جولائی تک ایڈنبرا اور لِلشال میں ہونے والے برطانیہ کے دورے کے دوران بھارت نے اسکاٹ لینڈ کی سینئر ویمن ٹیم کے علاوہ امریکا، انگلینڈ اور بلجیم کی جونیئر ٹیموں کے خلاف مجموعی طور پر 7 میچز کھیلے۔

بھارت نے امریکا کو 6-0 سے شکست دی، جبکہ انگلینڈ کے خلاف مسلسل دو میچوں میں 2-0 سے کامیابی حاصل کی۔ امریکا کے خلاف ایک اور مقابلہ 1-1 سے برابر رہنے کے بعد بھارت نے پنالٹی شوٹ آؤٹ میں 3-2 سے کامیابی حاصل کی۔اس دورے کے دوران بھارتی ٹیم کو اسکاٹ لینڈ کی تجربہ کار سینئر ٹیم اوربلجیم کی مضبوط انڈر-21 ٹیم کے خلاف کھیلنے کا بھی اہم تجربہ ملا۔

چین روانگی سے قبل ہیڈ کوچ ٹم وائٹ نے کہا کہ ٹیم ایشیا کپ کے لیے چین جانے کو لے کر بہت پرجوش ہے اور اس کی تیاری اچھی رہی ہے۔انہوں نے بتایا کہ بھارتی ٹیم نے بنگلورو میں انڈیا سینئر ٹیم کے خلاف بھی چار اہم میچ کھیلے ہیں۔ کوچ کے مطابق ٹیم نے ایسی حکمت عملی تیار کی ہے جس کے خلاف حریف ٹیموں کے لیے کھیلنا مشکل ہوگا۔

ٹم وائٹ نے کہا کہ اب ٹیم ایشیا کی بہترین جونیئر ٹیموں کے خلاف اپنی حکمت عملی کو آزمانے کے لیے پرجوش ہے۔بھارت کو خواتین کے ایلیٹ پول میں میزبان چین، جاپان، جنوبی کوریا اور ملائیشیا کے ساتھ رکھا گیا ہے۔ بھارتی ٹیم اپنی مہم کا آغاز 5 ستمبر کو جنوبی کوریا کے خلاف کرے گی۔ایلیٹ پول کے مقابلوں کے بعد ٹورنامنٹ ناک آؤٹ مرحلے میں داخل ہوگا۔ طلائی تمغے کا مقابلہ 13 ستمبر کو کھیلا جائے گا۔

اے ایچ ایف ویمن جونیئر ایشیا کپ ایشیا کی بہترین جونیئر ہاکی ٹیموں کے لیے ایک اہم پلیٹ فارم ہے، جہاں نوجوان کھلاڑیوں کو براعظم کی مضبوط ٹیموں کے خلاف اپنی صلاحیتیں ثابت کرنے کا موقع ملتا ہے۔

ہندوستھان سماچار

ہندوستان سماچار / Mohammad Khan