نئی دہلی، 27 اگست (ہ س)۔ وزیر اعظم نریندر مودی ہفتہ سے دو ممالک ازبکستان اور کرغزستان کے دورے پر روانہ ہوں گے۔ اس دوران وہ شنگھائی تعاون تنظیم (ایس سی او) کے 26ویں سربراہ اجلاس میں شرکت کریں گے۔

وزارت خارجہ کے مطابق وزیر اعظم 31 اگست سے یکم ستمبر تک بشکیک (کرغزستان) میں منعقد ہونے والے 26ویں ایس سی او سربراہی اجلاس میں شرکت کریں گے۔ یہ سربراہی اجلاس شنگھائی تعاون تنظیم کی 25ویں سالگرہ کے موقع پر منعقد کیا جائے گا، جس کا ہندوستان 2017 سے مکمل رکن ہے۔

وزارت کے مطابق اس دوران وزیر اعظم سربراہی اجلاس سے خطاب کریں گے۔ وہ پلیٹ فارم پر ہندوستان کی سلامتی، رابطے اور مواقع سے متعلق ترجیحات کو اجاگر کریں گے۔ اس کانفرنس میں وہ ایس سی او رہنماؤں کے ساتھ دو طرفہ ملاقاتیں بھی کریں گے۔ وہ وسطی ایشیا کے مالامال ثقافتی ورثے کا جشن منانے والے چھٹے عالمی نومیڈ گیمز کی افتتاحی تقریب میں بھی شرکت کریں گے۔

ایس سی او کانفرنس سے قبل وزیر اعظم مودی ازبکستان کا دورہ کریں گے۔ وہ 29 اور 30 اگست کو تاشقند کا سرکاری دورہ کریں گے۔ یہ ان کا اس ملک کا چوتھا دورہ ہوگا۔ اس دورے کے دوران وزیر اعظم دونوں ممالک کے درمیان اسٹریٹجک شراکت داری کو مضبوط بنانے کے لیے صدر مرزیوئیف کے ساتھ وفود کی سطح پر بات چیت کریں گے۔

دونوں رہنما تجارت اور سرمایہ کاری، دفاع، ڈیجیٹل رابطے، توانائی، تعلیم اور عوام سے عوام کے روابط کے شعبوں میں تعاون کا جائزہ لیں گے اور آئندہ کے لائحۂ عمل کا تعین کریں گے۔ وہ ’وکست بھارت 2047‘ اور ’ازبکستان-2030‘ کے مشترکہ ترقیاتی اہداف کو آگے بڑھانے پر بھی تبادلہ خیال کریں گے۔ اس دوران وزیر اعظم تاشقند میں شاستری میموریل اور تاشقند اسٹیٹ یونیورسٹی آف اورینٹل اسٹڈیز میں مہاتما گاندھی مرکز کا دورہ بھی کر سکتے ہیں۔

ہندوستھان سماچار

---------------

ہندوستان سماچار / عبدالواحد