کولمبو (سری لنکا)، 23 اگست (ہ س): بھارتی کرکٹ ٹیم کے ٹیسٹ اور ون ڈے کپتان شبھمن گل نے ٹیسٹ کرکٹ میں اپنے 3000 رنز مکمل کر لیے ہیں۔ اس کے ساتھ ہی وہ ٹیسٹ کرکٹ میں کم ترین عمر میں 3000 رنز مکمل کرنے والے بھارتی بلے بازوں کی فہرست میں چوتھے نمبر پر پہنچ گئے ہیں۔ گل نے یہ کارنامہ اتوار کو سری لنکا کے خلاف کولمبو میں کھیلے جا رہے دوسرے ٹیسٹ کے پہلے دن انجام دیا۔

گل کو اس سنگ میل تک پہنچنے کے لیے میچ سے قبل صرف سات رنز درکار تھے۔ اننگز کے 23ویں اوور میں کیشرا نوانتھا کی گیند پر چوکا لگاتے ہوئے گل نے اپنے 3000 ٹیسٹ رنز مکمل کیے۔ انہوں نے یہ کارنامہ 26 سال 349 دن کی عمر میں انجام دیا اور اس معاملے میں سابق بھارتی کپتان کپل دیو کو پیچھے چھوڑ دیا۔ کپل دیو نے 26 سال 356 دن کی عمر میں ٹیسٹ کرکٹ میں 3000 رنز مکمل کیے تھے۔

بھارت کے لیے کم ترین عمر میں 3000 ٹیسٹ رنز مکمل کرنے کا ریکارڈ عظیم بلے باز سچن تندولکر کے نام ہے۔ تندولکر نے محض 23 سال 228 دن کی عمر میں یہ کارنامہ انجام دیا تھا۔ جارح مزاج بلے باز وریندر سہواگ اس فہرست میں دوسرے نمبر پر ہیں، جنہوں نے 26 سال 157 دن کی عمر میں 3000 ٹیسٹ رنز مکمل کیے تھے۔ دلیپ وینگسرکر نے 26 سال 263 دن کی عمر میں یہ سنگ میل عبور کیا تھا۔

گل نے اپنے 43ویں ٹیسٹ میں 3000 رنز کا ہندسہ عبور کیا۔ اس میچ سے قبل ان کے نام 42 ٹیسٹ میچوں میں 11 سنچریاں اور آٹھ نصف سنچریاں درج تھیں۔

کم ترین عمر میں 3000 ٹیسٹ رنز بنانے والے بھارتی

23 سال 228 دن — سچن تندولکر

26 سال 157 دن — وریندر سہواگ

26 سال 263 دن — دلیپ وینگسرکر

26 سال 349 دن — شبھمن گل

26 سال 356 دن — کپل دیو

ہندوستھان سماچار

---------------

ہندوستان سماچار / عبدالواحد