لوزان، 22 اگست (ہ س)۔ بھارت کے اسٹار جیولین تھرو کھلاڑی نیرج چوپڑا نے جمعہ کو لوزان ڈائمنڈ لیگ میں سیزن کی اپنی بہترین کارکردگی کا مظاہرہ کرتے ہوئے 88.05 میٹر کی تھرو کی، لیکن وہ خطاب جیتنے سے محض نو سینٹی میٹر دور رہ گئے۔ سری لنکا کے رومیش پاتھیرگے نے 88.14 میٹر کی تھرو کے ساتھ پہلی پوزیشن حاصل کی۔

گریناڈا کے اینڈرسن پیٹرز 86.69 میٹر کی بہترین تھرو کے ساتھ تیسرے نمبر پر رہے۔

2026 کے دولت مشترکہ کھیلوں میں چاندی کا تمغہ جیت کر مقابلے میں اترنے والے نیرج نے پہلے کوشش میں 83.54 میٹر کی تھرو کی۔ اس کے بعد دوسری کوشش میں انہوں نے 88.05 میٹر کی دوری طے کرکے سیزن کی بہترین کارکردگی درج کی۔ دوسرے راؤنڈ کے بعد نیرج سرفہرست تھے۔

نیرج کی یہ گزشتہ سال جون میں پیرس ڈائمنڈ لیگ کے بعد پہلی 88 میٹر سے زیادہ کی تھرو بھی رہی۔ تاہم، دولت مشترکہ کھیلوں کے طلائی تمغہ فاتح پاتھیرگے نے تیسری کوشش میں 88.14 میٹر کی تھرو کرکے نیرج کو پیچھے چھوڑ دیا۔

دونوں کھلاڑیوں کی کارکردگی میں محض نو سینٹی میٹر کا فرق رہا، لیکن یہ فرق پاتھیرگے کے لیے خطاب جیتنے کے لیے کافی ثابت ہوا۔ یہ اس سال ڈائمنڈ لیگ میں پاتھیرگے کی تیسری فتح ہے۔ اس سے پہلے انہوں نے روم اور دوحہ میں بھی خطاب جیتا تھا۔

اس نتیجے کے ساتھ پاتھیرگے کے خلاف نیرج کا آمنے سامنے کا ریکارڈ 0-3 ہوگیا ہے۔ اب نیرج کی نظریں آئندہ ایشیائی کھیلوں پر ہوں گی، جہاں وہ سیزن کا اپنا پہلا خطاب جیت کر واپسی کرنا چاہیں گے۔

ہندوستھان سماچار

---------------

ہندوستان سماچار / عبدالواحد