نئی دہلی، 21 اگست (ہ س)۔ ہندوستانی خواتین کی ڈبلز جوڑی ٹریسا جولی اور گایتری گوپی چند نے جمعہ کو بی ڈبلیو ایف عالمی چمپئن شپ 2026 میں شاندار کامیابی حاصل کرتے ہوئے سیمی فائنل میں جگہ بنالی۔ اندرا گاندھی اسٹیڈیم میں کھیلے گئے کوارٹر فائنل میں ہندوستانی جوڑی نے عالمی درجہ بندی میں چوتھی سیڈ چین کی جیا یی فان اور ژانگ شو شیان کو سخت مقابلے میں 16-21، 21-15، 21-13 سے شکست دی۔ٹریسا اور گایتری نے مقابلے کا آغاز 2-6 سے پیچھے رہ کر کیا، لیکن اس کے بعد ہندوستانی جوڑی نے شاندار واپسی کی۔ بہتر اسماش اور مضبوط نیٹ پلے کے ذریعے انہوں نے اسکور برابر کیا اور کچھ دیر کے لیے برتری بھی حاصل کی۔ تاہم اہم لمحات میں چینی جوڑی نے بہتر کھیل پیش کیا اور مسلسل جارحانہ انداز اپناتے ہوئے پہلا گیم 21-16 سے اپنے نام کرلیا۔

دوسرے گیم میں ٹریسا اور گایتری نے ابتدا ہی سے جارحانہ کھیل کا مظاہرہ کیا اور چین کو برتری بنانے کا موقع نہیں دیا۔ دونوں جوڑیوں کے درمیان طویل ریلیز اور شاندار شاٹس کا سلسلہ جاری رہا اور اسکور 10-10 سے برابر ہوگیا۔ اس کے بعد چینی کھلاڑی کی ایک غلطی کا فائدہ اٹھاتے ہوئے ہندوستان نے برتری حاصل کی اور وقفے تک 11-10 سے آگے رہا۔ٹریسا کی عمدہ دفاعی صلاحیت اور گایتری کے کراس کورٹ اسماش نے ہندوستانی جوڑی کو مضبوط پوزیشن میں پہنچا دیا۔ ہندوستان نے دوسرا گیم 21-15 سے جیت کر مقابلہ فیصلہ کن گیم تک پہنچا دیا۔فیصلہ کن گیم میں ٹریسا اور گایتری نے ابتدا ہی سے مقابلے پر گرفت مضبوط رکھی۔ وقفے تک ہندوستانی جوڑی 11-5 سے آگے تھی۔ چھ پوائنٹس کی برتری حاصل کرنے کے بعد ہندوستانی کھلاڑیوں نے چین کو واپسی کا کوئی موقع نہیں دیا۔

جارحانہ اسماش، بہترین نیٹ پلے اور دباؤ کے لمحات میں شاندار تحمل کا مظاہرہ کرتے ہوئے ٹریسا اور گایتری نے فیصلہ کن گیم 21-13 سے جیت لیا۔ اس کامیابی کے ساتھ ہندوستانی جوڑی نے بی ڈبلیو ایف عالمی چیمپئن شپ 2026 کے سیمی فائنل میں جگہ پکی کرلی۔

ہندوستھان سماچار

ہندوستان سماچار / Mohammad Khan