بیجنگ، 21 اگست(ہ س)۔ چین نے ایران کے خلاف امریکی پابندیوں اور بڑھتے ہوئے اقتصادی دباؤ کی مخالفت کرتے ہوئے کہا ہے کہ پابندیاں اور دباؤ مشرقِ وسطیٰ کے تنازع کا حل نہیں ہیں۔ بیجنگ نے تمام متعلقہ فریقوں سے مسئلے کو سیاسی اور سفارتی ذرائع سے حل کرنے کے لیے ذمہ دارانہ اقدامات کرنے کی اپیل کی ہے۔
چینی وزارت خارجہ کے ترجمان لن جیان نے جمعہ کو صحافیوں سے گفتگو کرتے ہوئے کہا کہ پابندیاں اور دباؤ موجودہ مسئلے کے حل میں مدد نہیں کریں گے۔ انہوں نے کہا کہ چین تمام متعلقہ فریقوں سے ذمہ داری کا مظاہرہ کرتے ہوئے تنازع کے سیاسی اور سفارتی حل کی کوشش کرنے کا مطالبہ کرتا ہے۔یہ بیان ایسے وقت میں سامنے آیا ہے جب امریکا نے چین سمیت دیگر ممالک پر زور دیا ہے کہ وہ ایران کی معیشت کو عالمی سطح پر تنہا کرنے کی کوششوں میں واشنگٹن کا ساتھ دیں۔
امریکی وزیر خزانہ اسکاٹ بیسنٹ نے ایران کے خلاف صدر ڈونلڈ ٹرمپ کی اقتصادی مہم کا دفاع کرتے ہوئے کہا ہے کہ واشنگٹن چاہتا ہے کہ بیجنگ بھی اس مہم میں شامل ہو۔چینی ترجمان نے امریکی مطالبے کے جواب میں کہا کہ چین غیر قانونی یکطرفہ پابندیوں کی مخالفت کرتا ہے، جن کی بین الاقوامی قانون میں کوئی بنیاد نہیں اور جن کی اقوام متحدہ کی سلامتی کونسل نے منظوری نہیں دی ہے۔چین نے ایک بار پھر تمام متعلقہ ممالک پر زور دیا کہ وہ کشیدگی کم کرنے، مذاکرات کو آگے بڑھانے اور تنازع کا پرامن حل تلاش کرنے کے لیے ذمہ دارانہ اقدامات کریں۔
ہندوستھان سماچار
ہندوستان سماچار / Mohammad Khan
