تہران،02اگست(ہ س)۔ایران کی اعلیٰ عسکری قیادت نے مشرقِ وسطیٰ کے ممالک کو امریکا کے ساتھ دفاعی تعاون سے گریز کرنے کی سخت وارننگ دیتے ہوئے کہا ہے کہ جو ممالک امریکی فوجی سرگرمیوں کا حصہ بنیں گے یا واشنگٹن کے لیے دفاعی ڈھال کا کردار ادا کریں گے، وہ ممکنہ طور پر کسی بھی علاقائی تنازع کے اثرات سے محفوظ نہیں رہ سکیں گے۔

ایران کی خاتم الانبیائ سینٹرل ہیڈکوارٹرز کے کمانڈر میجر جنرل علی عبداللہٰی نے سرکاری نشریاتی ادارے آئی آر آئی بی سے گفتگو میں کہا کہ مسلم ممالک کو موجودہ علاقائی صورتحال میں دانش مندی کا مظاہرہ کرنا چاہیے اور امریکا کے ساتھ اپنے عسکری تعاون اور صف بندی کا ازسرنو جائزہ لینا چاہیے۔انہوں نے کہا کہ امریکا اپنی کمزور ہوتی عسکری پوزیشن کے باعث خطے کے ممالک کے وسائل، بنیادی ڈھانچے اور مالی صلاحیتوں کو اپنے دفاعی مفادات اور اسرائیل کی حمایت کے لیے استعمال کرنا چاہتا ہے۔

میجر جنرل علی عبداللہٰی کا کہنا تھا کہ واشنگٹن کی موجودہ پالیسیاں مشرقِ وسطیٰ کو ایک وسیع تر جنگ کی طرف دھکیل رہی ہیں، جس کے سنگین نتائج پورے خطے کو بھگتنا پڑ سکتے ہیں۔

ایرانی کمانڈر نے علاقائی ممالک پر زور دیا کہ وہ امریکا کے ساتھ اپنے تعلقات اور سکیورٹی تعاون پر دوبارہ غور کریں تاکہ خطے میں کشیدگی میں مزید اضافہ نہ ہو اور ممکنہ تنازعات سے بچا جا سکے۔

ہندوستھان سماچار

ہندوستان سماچار / Mohammad Khan