نئی دہلی، 18 اگست (ہ س)۔ عالمی فٹبال کی اعلیٰ ترین تنظیم فیفا نے اپنے چیف آپریٹنگ آفیسر (سی او او) کیون لامور سے علیحدگی اختیار کر لی ہے۔ یہ پیش رفت فیفا کے صدر جیانی انفینٹینو کے عالمی کپ میں حصہ داری سرمایہ کاروں کو فروخت کرنے کے منصوبے پر لامور کی جانب سے تنقید کیے جانے کے بعد سامنے آئی ہے۔

فیفا کے ملازمین کو تنظیم کے جنرل سیکریٹری میٹیاس گرافسٹروم کی جانب سے ای میل کے ذریعے اس فیصلے کی اطلاع دی گئی۔ ای میل میں کہا گیا کہ فیفا اور لامور نے باہمی رضامندی سے الگ ہونے کا فیصلہ کیا ہے۔

بی بی سی اسپورٹس کے مطابق، فیفا کے ترجمان نے کہا، چیف آپریٹنگ آفیسر کے طور پر فیفا اور کیون لامور کے درمیان ملازمت کا تعلق 17 اگست 2026 کو ختم ہوگیا۔ فیفا ان کی دو سالہ خدمات کے لیے ان کا شکریہ ادا کرتا ہے اور ان کے مستقبل کے لیے نیک خواہشات کا اظہار کرتا ہے۔

لامور کی رخصتی ایسے وقت میں ہوئی ہے جب انہوں نے انفینٹینو کے عالمی کپ کی حصہ داری سرمایہ کاروں کو فروخت کرنے کے منصوبے پر کھل کر سوال اٹھائے تھے۔ اس منصوبے کو بعد میں یوئیفا، اے ایف سی اور کونکاکاف سمیت کئی اہم فٹبال تنظیموں کے سخت ردعمل کے بعد انفینٹینو نے ترک کر دیا تھا۔

لامور نے اس منصوبے کو ایک شخص کا منصوبہ قرار دیا تھا۔ انہوں نے یہ الزام بھی لگایا تھا کہ اس منصوبے کے حوالے سے فیفا انتظامیہ کو گمراہ کیا گیا۔

انہوں نے کہا تھا، ہمارا مشن—فیفا کے سیکڑوں وقف اور پُرجوش ملازمین کا مشن—فٹبال کی خدمت کرنا ہے۔ ایک صدر کو لوگوں کو ساتھ لانا، متحد کرنا اور تحریک دینا چاہیے۔ آج ہم اس کے برعکس صورتحال کا سامنا کر رہے ہیں۔

لامور نے اپنی ملازمت جانے کے ممکنہ خدشے پر بھی واضح موقف اختیار کیا تھا۔ انہوں نے کہا تھا، اگر اس کا مطلب ہے کہ میں اپنی ملازمت کھو دوں گا، تو ایسا ہی سہی۔ میں اس فیصلے کو سمجھوں گا اور اس کا احترام کروں گا۔ کم از کم اس رات میں سکون سے سو سکوں گا۔

عالمی کپ کی حصہ داری فروخت کرنے کے منصوبے کو لے کر یوئیفا، کونکاکاف اور اے ایف سی نے بھی فیفا پر سنگین الزامات عائد کیے تھے۔ تینوں تنظیموں نے مشترکہ بیان میں اسے اعتماد کی بنیادی خلاف ورزی اور دھوکے کا معاملہ قرار دیا تھا۔

مشترکہ بیان میں کہا گیا تھا کہ معاملہ صرف کسی منصوبے کا نہیں، بلکہ کھیل کے وقار اور اسے چلانے کے لیے منتخب کیے گئے لوگوں کی دیانت داری سے متعلق ہے۔

تنظیموں نے یہ بھی کہا تھا کہ فٹبال میں قیادت کسی فرد کی ذاتی ملکیت نہیں ہے، بلکہ یہ پورے فٹبال خاندان کی خدمت کرنے کی ذمہ داری ہے۔ ان کے مطابق، جب دھوکے کے ذریعے اعتماد توڑا جاتا ہے اور کوئی شخص اس اجتماعی ادارے سے خود کو بالاتر سمجھتا ہے جس نے اسے اختیار سونپا ہے، تو قیادت کی ذمہ داری سے سبکدوش ہونا پڑتا ہے۔

ہندوستھان سماچار

---------------

ہندوستان سماچار / عبدالواحد