ممبئی ، 17 اگست (ہ س)۔ مرکزی وزیر برائے سڑک نقل و حمل و شاہراہ نتن گڈکری نے کہا ہے کہ مہاراشٹر کے پونے میں آئندہ برسوں کے دوران تقریباً 60 ہزار کروڑ روپے کے بنیادی ڈھانچے کے منصوبوں کی منصوبہ بندی کی گئی ہے۔ ان منصوبوں کو عملی جامہ پہنانے کے لیے نئے مالیاتی ماڈل تلاش کیے جا رہے ہیں۔ گڈکری پونے میں سمبیوسس انٹرنیشنل یونیورسٹی کی جانب سے منعقدہ فیسٹیول آف تھنکرز لیکچر سیریز سے خطاب کر رہے تھے۔ انہوں نے کہا کہ ہندوستان کی اقتصادی ترقی کے لیے مضبوط، جدید اور پائیدار بنیادی ڈھانچہ ضروری ہے۔ بنیادی ڈھانچے کے منصوبوں کی منصوبہ بندی صرف موجودہ ضروریات کے مطابق نہیں بلکہ آئندہ 25 سے 50 برسوں کی ضروریات کو مدنظر رکھتے ہوئے کی جانی چاہیے۔انہوں نے کہا کہ مضبوط بنیادی ڈھانچے سے صنعت، تجارت، سیاحت اور روزگار کو فروغ ملتا ہے۔ نقل و حمل کی لاگت کم ہونے سے ہندوستانی صنعت عالمی بازار میں زیادہ مسابقتی بن سکتی ہے۔ بہتر سڑک رابطوں سے کسانوں کو اپنی پیداوار بازار تک پہنچانے میں سہولت ہوگی اور دیہی علاقوں کو معیشت کے مرکزی دھارے سے جوڑنے میں بھی مدد ملے گی۔ ممبئی پونے ایکسپریس وے کی تعمیر کا تجربہ بیان کرتے ہوئے گڈکری نے کہا کہ سڑکوں اور شاہراہوں کی گنجائش طے کرتے وقت مستقبل میں بڑھنے والی ٹریفک کی ضروریات کا بھی اندازہ لگایا جانا چاہیے۔ انہوں نے عارضی حل کے بجائے طویل مدتی منصوبہ بندی کے ساتھ بنیادی ڈھانچے کو ترقی دینے پر زور دیا۔ مرکزی وزیر نے نالج ٹو ویلتھ یعنی علم کو دولت میں تبدیل کرنے کے تصور کو مستقبل کی اقتصادی ترقی کے لیے اہم قرار دیا۔ انہوں نے کہا کہ علم کو اقتصادی قدر میں تبدیل کرنے کے لیے ٹیکنالوجی، تحقیق، اختراع، صنعت کاری اور ہنرمندی کی ترقی کو فروغ دینا ضروری ہے۔گڈکری نے نوجوانوں سے شارٹ کٹ سے بچنے اور ایمانداری، اعتماد، معیار اور مضبوط اقدار کے ساتھ آگے بڑھنے کی اپیل کی۔ انہوں نے کہا کہ ترقی کی رفتار کو ماحولیاتی تحفظ اور پائیدار اقتصادی ترقی کے ساتھ متوازن رکھنا بھی ضروری ہے۔ پروگرام میں سمبیوسس کی پرنسپل ڈائریکٹر اور ایس آئی یو کی چانسلر ڈاکٹر ودیا یروڈیکر، وائس چانسلر ڈاکٹر رام کرشنن رمن، پرووسٹ میڈیکل اینڈ ہیلتھ سائنسز ڈاکٹر راجیو یروڈیکر، رجسٹرار ڈاکٹر شیزول اور دیگر معزز شخصیات موجود تھیں۔

ہندوستھان سماچار

--------------------

ہندوستان سماچار / جاوید این اے