محنت کی کمائی سے طلبہ کے چہروں پر خوشیاں بکھیرنے کی منفرد پہل

ممبئی ، 17 اگست (ہ س)۔ اپنی محنت کی کمائی کا ایک حصہ معاشرے کی خدمت کے لیے وقف کرتے ہوئے انر وائس سوشل ویلفیئر فاؤنڈیشن نے الہاس نگر 5 کے جاگرتی ودیالیہ کے 300 طلبہ کے لیے خصوصی پہل کی۔ یوم آزادی کے موقع پر فاؤنڈیشن کی 51 ویں سماجی خدمت کے تحت طلبہ میں اسکول یونیفارم، تعلیمی سامان اور کھیلوں کا سامان تقسیم کیا گیا، جبکہ اسکول کی بنیادی سہولیات بہتر بنانے کے لیے بھی مختلف کام کیے گئے۔

فاؤنڈیشن کے مطابق سماجی خدمت صرف چندہ جمع کرکے ضرورت مندوں میں سامان تقسیم کرنے تک محدود نہیں، بلکہ اپنی محنت کی کمائی کا ایک حصہ معاشرے کے لیے وقف کرنا اور حقیقی ضرورت کو سمجھ کر مدد فراہم کرنا بھی سماجی ذمہ داری ہے۔ فاؤنڈیشن سے وابستہ کئی ملازمت پیشہ افراد اپنی ماہانہ آمدنی کا ایک حصہ رضاکارانہ طور پر عطیہ کرتے ہیں اور انہی عطیات سے ضرورت مند اسکولوں اور طلبہ کی مدد کی جاتی ہے۔

یوم آزادی کے موقع پر پرچم کشائی کی تقریب کے بعد جاگرتی ودیالیہ کے 300 طلبہ میں تعلیم، کھیل اور روزمرہ استعمال کی ضروری اشیا تقسیم کی گئیں۔ طلبہ کو اسکول یونیفارم، تعلیمی سامان اور کھیلوں کا سامان فراہم کیا گیا، جس سے ان کی تعلیمی اور دیگر ضروریات پوری کرنے میں مدد ملی۔فاؤنڈیشن کی جانب سے اسکول کی عمارت کا رنگ و روغن بھی کرایا گیا۔ اس کے علاوہ باؤنڈری وال اور حفاظتی گرل لگانے کا کام انجام دیا گیا، جس سے اسکول کی عمارت اور طلبہ کی حفاظت سے متعلق سہولیات میں بہتری آئی۔

اس موقع پر اسکول کو 2 بڑی الماریاں، فرسٹ ایڈ کٹ، پانی کی بوتلیں اور دیگر ضروری سامان بھی فراہم کیا گیا۔ اس طرح طلبہ کو براہ راست ضروری اشیا فراہم کرنے کے ساتھ اسکول کی بنیادی سہولیات بہتر بنانے پر بھی توجہ دی گئی۔تقریب میں جاگرتی ودیالیہ کے بانی شندے سر کے علاوہ انر وائس سوشل ویلفیئر فاؤنڈیشن کے صدر سویاگ کرانڈے، سیکریٹری گنیش کھنڈارے، خزانچی نیلیش شندے، امیت سی، پرکاش روکڑے، مکل سالونکھے، وی این گھنوٹ، دیکشا مورے، سندیپ گلو نجکر، گنیش ہنگے، ہیما دیسائی، اشوک کونڈیلکر، دھرو اگروال، روی داس باوسکر، سنتوش چھوٹے اور دیگر افراد موجود تھے۔

فاؤنڈیشن کی اس پہل کے ذریعے یہ پیغام دیا گیا کہ اگر ہر شخص یہ سوچ کر سماجی خدمت کا آغاز کرے کہ وہ معاشرے کے لیے کتنا تعاون کرسکتا ہے تو چھوٹا سا انفرادی تعاون بھی ضرورت مندوں کی زندگی میں بڑی تبدیلی لا سکتا ہے۔

ہندوستھان سماچار

--------------------

ہندوستان سماچار / جاوید این اے