مانٹریل، 14 اگست (ہ س)۔ امریکہ کے بین شیلٹن نے جمعرات کی رات ہم وطن برینڈن نکاشیما کو 6-3، 7-6(4) سے شکست دے کر مسلسل دوسری بار کینیڈین اوپن کا خطاب اپنے نام کر لیا۔ شیلٹن کا یہ دوسرا ماسٹرز 1000 خطاب اور کیریئر کا ساتواں اے ٹی پی خطاب ہے۔

دو امریکی کھلاڑیوں کے درمیان کھیلا گیا یہ فائنل ماسٹرز 1000 سطح پر 2003 میں سنسناتی میں اینڈی راڈک اور مارڈی فش کے درمیان کھیلے گئے فائنل کے بعد پہلا آل امریکن فائنل تھا۔ یہ کامیابی امریکی مردوں کی ٹینس کے لیے بھی حوصلہ افزا اشارہ ہے، کیونکہ 2003 میں راڈک کی کامیابی کے بعد سے کوئی بھی امریکی مرد کھلاڑی یو ایس اوپن کا سنگلز خطاب نہیں جیت سکا ہے۔

کینیڈا پہنچنے سے قبل شیلٹن خراب دور سے گزر رہے تھے۔ وہ ومبلڈن کے پہلے ہی راؤنڈ میں باہر ہو گئے تھے، جبکہ فرنچ اوپن میں انہیں دوسرے راؤنڈ میں شکست کا سامنا کرنا پڑا تھا۔ سیزن کے پہلے چار ماسٹرز 1000 ٹورنامنٹس میں وہ صرف ایک میچ جیت سکے تھے۔تاہم، کینیڈا کے ہارڈ کورٹ پر شیلٹن نے شاندار واپسی کی اور پورے ٹورنامنٹ میں ایک بھی سیٹ گنوائے بغیر خطاب اپنے نام کر لیا۔

شیلٹن نے کہا، ’’اس ہفتے جس طرح میں نے کھیلا اور ایک بھی سیٹ گنوائے بغیر اس ڈرا میں آگے بڑھا، یہ اس محنت کی عکاسی کرتا ہے جو میں کر رہا ہوں۔ یہ میری ذہنی مضبوطی کو بھی ظاہر کرتا ہے۔‘‘انہوں نے کہا، ’’یہ سال میرے لیے آسان یا سیدھا نہیں رہا۔ اس طرح کی کارکردگی کے ساتھ اپنی بہترین سطح پر کھیلنا میرے لیے انتہائی خاص ہے۔ میرے پاس اسے بیان کرنے کے لیے الفاظ نہیں ہیں۔‘‘

پانچویں سیڈ شیلٹن نے پہلے سیٹ میں نکاشیما کی دوسری سرو پر مسلسل حملہ کیا۔ دونوں کھلاڑیوں نے 3-3 تک اپنی سرو برقرار رکھی، لیکن اس کے بعد شیلٹن نے ناکاشیما کی دوسری سرو پر شاندار فورہینڈ ریٹرن لگاتے ہوئے 4-3 کی برتری حاصل کر لی۔اس کے بعد انہوں نے ناکاشیما کے کمزور ہوتے فورہینڈ کا فائدہ اٹھاتے ہوئے ایک اور بریک حاصل کیا اور پہلا سیٹ 6-3 سے جیت لیا۔پہلی بار ماسٹرز 1000 فائنل کھیل رہے نکاشیما نے دوسرے سیٹ میں واپسی کی کوشش کی اور شیلٹن کو ٹائی بریک تک لے گئے۔ تاہم، شیلٹن نے ٹائی بریک کے آغاز میں ہی منی بریک حاصل کرکے برتری بنا لی۔اس کے بعد شاندار فورہینڈ ونر کے ساتھ انہوں نے ٹائی بریک 7-4 سے جیت لیا اور 7-6(4) کے اسکور کے ساتھ سیٹ اور میچ اپنے نام کر لیا۔

اس کامیابی کے ساتھ شیلٹن 2016 میں نوواک جوکووچ کے بعد کینیڈین اوپن کا خطاب ایک بھی سیٹ گنوائے بغیر جیتنے والے پہلے کھلاڑی بن گئے۔ اس کے علاوہ وہ 2019 میں رافیل نڈال کے بعد کینیڈین اوپن کے خطاب کا کامیابی سے دفاع کرنے والے پہلے کھلاڑی بھی بن گئے۔

ہندوستھان سماچار

ہندوستان سماچار / Mohammad Khan