جموں و کشمیر پاور ایمپلائز اینڈ انجینئرز کوآرڈی نیشن کمیٹی کا ہڑتال ختم کرنے کا اعلان

جموں، 14 اگست (ہ س)۔

جموں و کشمیر پاور ایمپلائز اینڈ انجینئرز کوآرڈی نیشن کمیٹی نے جموں پاور ڈسٹری بیوشن کارپوریشن کی جانب سے ملازمین کے معطلی کے احکامات واپس لیے جانے کے بعد اپنی غیر معینہ مدت کی ہڑتال ختم کردی۔ ملازمین نے 13 اگست کو مختلف مطالبات کے حق میں ہڑتال شروع کی تھی۔

کمیٹی اور جے پی ڈی سی ایل انتظامیہ کے درمیان نصف شب کے بعد کئی گھنٹوں تک جاری رہنے والے مذاکرات کے بعد نو نکاتی مطالبات پر مفاہمتی معاہدہ طے پایا۔ معاہدے پر رات تقریباً ایک بج کر 45 منٹ پر دستخط کیے گئے۔

انتظامیہ نے 6 اگست کو جاری کیے گئے چھ ملازمین کے معطلی کے احکامات واپس لینے کے ساتھ شع کاز نوٹس بھی فی الحال مؤخر کردیئے ہیں۔ معطل ملازمین میں دو لائن مین، دو میٹر ریڈر، ایک جونیئر انجینئر اور ایک اسسٹنٹ انجینئر شامل تھے۔ میران صاحب سب ڈویژن سے منسلک ملازمین کو بھی واپس متعلقہ انتظامی دائرے میں بھیج دیا گیا ہے۔

بجلی چوری کے معاملات میں مقدمات درج کرنے کے مطالبے پر انتظامیہ نے یقین دہانی کرائی کہ بجلی ایکٹ 2003 کی متعلقہ دفعات کے تحت مجاز افسر پولیس تھانوں میں شکایات درج کرائے گا۔ اس مقصد کے لیے متعلقہ افسر کو چار ہفتوں کے اندر مجاز قرار دیا جائے گا۔

خراب میٹروں کے حوالے سے جامع ضابطۂ کار ایک ماہ کے اندر وضع کرنے پر اتفاق کیا گیا، جبکہ خراب یا رابطہ نہ کرنے والے میٹروں کی بلنگ کے معاملے کو ستمبر کے اگلے بلنگ دور سے قبل بجلی ضابطہ کمیشن کے سامنے اٹھایا جائے گا۔

معاہدے کے مطابق میٹروں کی تنصیب، تبدیلی، مواصلاتی نظام یا دیکھ بھال میں خامیوں کی صورت میں متعلقہ اداروں کی ذمہ داری طے کرکے معاہدے کے مطابق کارروائی کی جائے گی۔ بجلی چوری کے معاملات میں ملازمین کے خلاف معطلی کی کارروائی بھی مقررہ قواعد کے مطابق کی جائے گی۔

انتظامیہ نے شمسی توانائی کی تنصیبات سے متعلق ملازمین کے تحفظات دور کرنے، صارفین میں آگاہی بڑھانے اور روف ٹاپ سولر منصوبے کے تحت مزید تشہیری سرگرمیاں انجام دینے کی بھی یقین دہانی کرائی۔ اس کے علاوہ تمام زمروں کے ملازمین کی ترقی کے معاملات تیز رفتاری سے نمٹانے پر بھی اتفاق کیا گیا۔

معاہدے کے بعد کمیٹی نے ہڑتال فوری طور پر ختم کرنے کا اعلان کردیا اور بجلی ملازمین معمول کی خدمات پر واپس آگئے۔

ہندوستھان سماچار

ہندوستان سماچار / محمد اصغر