جموں, 13 اگست (ہ س): جموں و کشمیر میں بارش کا سلسلہ جاری ہے اور محکمہ موسمیات نے 19 اگست تک مختلف علاقوں میں بارش کے ساتھ بعض مقامات پر شدید بارش کی پیش گوئی کرتے ہوئے نچلے علاقوں میں اچانک سیلاب اور پہاڑی علاقوں میں لینڈ سلائیڈنگ کے خطرے کے پیش نظر لوگوں کو محتاط رہنے کا مشورہ دیا ہے۔

محکمہ موسمیات کے مطابق گزشتہ چوبیس گھنٹوں کے دوران پونچھ میں 53 ملی میٹر، پلوامہ میں 57.5 ملی میٹر، اونتی پورہ میں 47.8 ملی میٹر اور راجوری میں 44 ملی میٹر بارش ریکارڈ کی گئی۔محکمہ کے مطابق 13 سے 15 اگست تک جموں و کشمیر کے کئی علاقوں میں بارش کا امکان ہے، جبکہ صبح اور دوپہر کے بعد بعض مقامات پر تیز بوندا باندی یا بارش ہو سکتی ہے۔

وہیں16 سے 19 اگست کے دوران بھی بیشتر علاقوں میں ہلکی سے درمیانی بارش کے ساتھ جموں ڈویژن کے بعض اضلاع میں شدید بارش اور تیز بوندا باندی کا امکان ظاہر کیا گیا ہے۔ اس دوران کشمیر ڈویژن کے ایک دو اضلاع میں بھی شدید بارش ہو سکتی ہے۔

محکمہ موسمیات نے خبردار کیا ہے کہ شدید بارش کے باعث نچلے علاقوں میں اچانک سیلاب جبکہ پہاڑی علاقوں میں لینڈ سلائیڈنگ اور ملبہ گرنے کے واقعات پیش آ سکتے ہیں۔ لوگوں کو موسمی صورتحال پر نظر رکھنے اور حساس علاقوں میں غیر ضروری سفر سے گریز سمیت احتیاطی تدابیر اختیار کرنے کا مشورہ دیا گیا ہے۔

20 سے 22 اگست کے دوران بھی بعض مقامات پر ہلکی بارش یا گرج چمک کے ساتھ بوندا باندی کا امکان ہے۔

ہندوستھان سماچار

---------------

ہندوستان سماچار / محمد اصغر