جموں, 13 اگست (ہ س)جموں و کشمیر بھارتیہ جنتا پارٹی نے کھیل کوٹے کے تحت نمایاں کھلاڑیوں کی سرکاری ملازمتوں کے انتخاب میں مبینہ بے ضابطگیوں کی اعلیٰ سطحی اور غیر جانب دارانہ تحقیقات کا مطالبہ کیا ہے۔

بی جے پی کے وفد نے احتجاج کرنے والے کھلاڑیوں سے ملاقات کرکے ان کے مطالبات کی حمایت کی۔ وفد کی قیادت پارٹی کے قومی سکریٹری اور جموں جنوبی کے رکن اسمبلی ڈاکٹر نریندر سنگھ نے کی۔

اس موقع پر ڈاکٹر نریندر سنگھ نے کہا کہ لیفٹیننٹ گورنر کو تمام متعلقہ دستاویزات کے ساتھ تفصیلی مکتوب پیش کیا گیا ہے اور مطالبہ کیا گیا ہے کہ حالیہ انتخابی عمل کا مکمل جائزہ لیا جائے۔ انہوں نے کہا کہ کسی منتخب امیدوار سے شکایت نہیں، تاہم یہ یقینی بنایا جانا ضروری ہے کہ تمام مستحق کھلاڑیوں کو منصفانہ موقع ملا ہو۔

بی جے پی رہنماؤں نے الزام عائد کیا کہ کئی دنوں سے احتجاج کرنے والے کھلاڑیوں کے مسائل پر حکومت نے توجہ نہیں دی۔ انہوں نے کھیلوں کے وزیر سے بھی احتجاجی کھلاڑیوں سے ملاقات کرکے ان کے مسائل حل کرنے کا مطالبہ کیا۔

پارٹی نے انتخابی فہرست پر فوری نظرثانی، شفاف جانچ اور تمام اہل و مستحق کھلاڑیوں کو سرکاری ملازمت فراہم کرنے کا مطالبہ کیا۔ بی جے پی رہنماؤں نے انتخابی عمل میں مبینہ علاقائی عدم توازن پر بھی سوال اٹھاتے ہوئے کہا کہ معاملے کی مکمل تحقیقات ضروری ہیں۔

انہوں نے کہا کہ جموں و کشمیر اور ملک کے لیے اعزاز حاصل کرنے والے کھلاڑی انصاف اور مناسب حوصلہ افزائی کے مستحق ہیں۔ بی جے پی نے خبردار کیا کہ حکومت نے مطالبات پر کارروائی نہ کی تو احتجاج وسیع عوامی تحریک کی شکل اختیار کرسکتا ہے۔

ہندوستھان سماچار

---------------

ہندوستان سماچار / محمد اصغر