جموں, 12 اگست (ہ س)۔ جموں و کشمیر کے وزیر ستیش شرما نے وزیر اعلی عمر عبداللہ کو خط لکھ کر ٹرانسپورٹ کمشنر ویشیش پال مہاجن کو فوری طور پر عہدے سے ہٹانے کا مطالبہ کیا ہے۔ستیش شرما نے الزام عائد کیا ہے کہ ٹرانسپورٹ کمشنر کی جانب سے وزارت کی تحریری اور زبانی ہدایات کو مسلسل نظرانداز کیا جا رہا ہے، جبکہ وزارت کو بائی پاس کرنے اور وزیر کے ساتھ نامناسب رویہ اختیار کرنے کی شکایات بھی سامنے آئی ہیں۔وزیر اعلی کو ارسال کیے گئے خط میں وزیر نے اس صورتحال کو ’سنگین‘ قرار دیتے ہوئے کہا کہ افسر کے مبینہ رویے کے باعث ٹرانسپورٹ محکمہ کے انتظامی امور متاثر ہو رہے ہیں۔

وزیر کے مطابق انہوں نے معاملے کو ابتدا میں غیر رسمی طور پر اور محکمہ کے اندرونی ذرائع سے حل کرنے کی کوشش کی، تاہم مبینہ طور پر افسر کے رویے میں کوئی بہتری نہیں آئی اور وزارت کی ہدایات کو نظرانداز کرنے کا سلسلہ جاری رہا۔ستیش شرما نے کہا کہ ٹرانسپورٹ کمشنر محکمہ کے اہم انتظامی افسر کی حیثیت سے وزیر کی پالیسی ہدایات اور مجموعی نگرانی میں کام کرتا ہے۔ انہوں نے کہا کہ کسی سینئر افسر کی مسلسل عدم تعمیل سے انتظامی جواب دہی کا سلسلہ متاثر ہوتا ہے اور محکمہ کے کام کاج پر بھی منفی اثر پڑتا ہے۔

وزیر نے وزیر اعلی عمر عبداللہ سے مطالبہ کیا کہ ویشیش پال مہاجن کو فوری طور پر ٹرانسپورٹ کمشنر کے عہدے سے ہٹا کر ان کی جگہ مناسب سینیارٹی کے حامل افسر کو تعینات کیا جائے۔

انہوں نے کہا کہ اس اقدام سے ٹرانسپورٹ محکمہ کے معمول کے کام کاج کو بحال کرنے اور مزید انتظامی رکاوٹوں کو روکنے میں مدد ملے گی۔

ہندوستھان سماچار

---------------

ہندوستان سماچار / محمد اصغر