کولکاتا، 12 اگست (ہ س)۔

کولکاتا میونسپل کارپوریشن کے وارڈوں کی تعداد بڑھانے سے متعلق کولکاتا میونسپل کارپوریشن (ترمیمی) بل، 2026 بدھ کو مغربی بنگال اسمبلی میں صوتی ووٹ سے منظور کر لیا گیا۔ شہری ترقی کی وزیر اگنی مترا پال نے ایوان میں بل پیش کیا۔ بل پر بحث کے بعد اسے صوتی ووٹ سے منظوری دی گئی۔

اسمبلی اسپیکر رتھیندر بوس نے بل پر ووٹنگ کا عمل مکمل کرایا۔ بل میں کولکاتا میونسپل کارپوریشن ایکٹ، 1980 کی دفعہ 5 میں ترمیم کی تجویز ہے۔ اس کے تحت کارپوریشن میں منتخب کونسلروں کی تعداد 144 سے بڑھا کر 209 کرنے کی شق رکھی گئی ہے۔

بل پر بحث کے دوران اپوزیشن کے ارکان نے بھی اپنے خیالات پیش کیے۔ وزیراعلیٰ شبھیندو ادھیکاری نے بھی بحث میں حصہ لیا۔ انہوں نے واضح کیا کہ فی الحال بل کے ذریعے صرف وارڈوں کی تعداد بڑھائی جا رہی ہے۔ وارڈوں کی حدود اور ووٹروں کی تعداد کا حتمی تعین بعد کے مرحلے میں کیا جائے گا۔

وزیراعلیٰ نے بتایا کہ الیکشن کمیشن وارڈوں کی حدود اور ووٹروں سے متعلق معاملات پر دو کل جماعتی اجلاس منعقد کرے گا۔ ان اجلاسوں میں سیاسی جماعتوں سے تجاویز لی جائیں گی۔ اس کے بعد حد بندی کا عمل مکمل کرکے حتمی فہرست شائع کی جائے گی۔

بل کے مقاصد اور وجوہات میں کہا گیا ہے کہ کولکاتا میونسپل کارپوریشن کے وارڈوں کی تعداد میں ترمیم وارڈ وار آبادی، رہائشی نوعیت، جغرافیائی حالات اور کارپوریشن سے متعلق اقتصادی پہلوو¿ں کو مدنظر رکھتے ہوئے کی جا رہی ہے۔ بل کے نافذ ہونے کی تاریخ ریاستی حکومت گزٹ میں نوٹیفکیشن کے ذریعے طے کرے گی۔

ہندوستھان سماچار

ہندوستان سماچار / عطاءاللہ