علی گڑھ, 12 اگست (ہ س)۔

بین الاقوامی یومِ نوجوانان کے موقع پر ضلع قانونی خدمات اتھارٹی کی ہدایت پر پیرا لیگل رضاکاروں کی جانب سے ضلع کے مختلف اسکولوں اور کالجوں میں قانونی بیداری کیمپ منعقد کیے گئے۔ کیمپوں کے ذریعے نوجوانوں اور عام لوگوں کو قانونی حقوق، فرائض اور مفت قانونی امداد کی سہولت کے بارے میں معلومات فراہم کی گئیں۔

اتر پردیش ریاستی قانونی خدمات اتھارٹی، لکھنؤ کی ہدایات اور ضلع جج و صدر ضلع قانونی خدمات اتھارٹی کی نگرانی میں منعقد ان کیمپوں کا مقصد نوجوانوں کو قانون اور اپنے حقوق کے تحفظ کے حوالے سے بیدار کرنا تھا۔ اس دوران تعلیم و روزگار سے متعلق حقوق، خواتین و بچوں کا تحفظ، سائبر جرائم سے بچاؤ، منشیات کے مضر اثرات اور سماجی ذمہ داریوں کے بارے میں آگاہ کیا گیا۔

پیرا لیگل رضاکاروں نے نوجوانوں سے اپیل کی کہ وہ اپنے حقوق و فرائض کے تئیں بیدار رہیں اور معاشرے میں قانون و انصاف کے حوالے سے آگاہی پھیلائیں۔ کیمپوں میں اہل افراد کو ضلع قانونی خدمات اتھارٹی کے ذریعے دستیاب مفت قانونی امداد اور اسے حاصل کرنے کے طریقۂ کار سے بھی آگاہ کیا گیا۔

---------------

ہندوستان سماچار / سید کامران علی گڑھ