نئی دہلی، 12 اگست (ہ س)۔کئی دہائیوں سے اوپری گنگا سے تقریباً غائب ہو چکی ہلسا مچھلی ایک بار پھر نظر آنے لگی ہے ۔ اتر پردیش کے چندولی ضلع کے ٹانڈہ خورد گاو¿ں کے قریب ہلسا مچھلی کے نظر آنے کو گنگا کی ماحولیات، آبی حیاتیاتی تنوع اور دریا پر منحصر ماہی گیر برادریوں کے لیے ایک اہم کامیابی قرار دیا جا رہا ہے۔

تاریخی طور پر، ہلسا خلیج بنگال سے دریائے گنگا کے ساتھ وارانسی، پریاگ راج اور اس سے آگے تک نظر آتی تھی۔ تاہم، 1975 میں فرکا بیراج کے شروع ہو جانے کے بعد اس کی ہجرت کے راستے میں شدید خلل پڑا، جس کے نتیجے میں دریائے گنگا کے درمیانی اور اوپری حصے میں ہلسا کی تعداد میں تیزی سے کمی واقع ہوئی۔

انڈین کونسل آف ایگریکلچرل ریسرچ (آئی سی اے آر) نے بدھ کو بتایا کہ آئی سی اے آر- سنٹرل ان لینڈ فشریز ریسرچ انسٹی ٹیوٹ، بیرک پور اور نیشنل مشن فار کلین گنگا نے 2019 میں ہلسا کے تحفظ اور بحالی کے لیے ایک طویل مدتی پروگرام شروع کیا تھا۔ اس مہم کے تحت، 3.85 لاکھ سے زیادہ ہلسا مچھلیوں کو جون 2019 میں دریا میں چھوڑا گیا تھا۔ اس کے ساتھ 40 لاکھ سے زیادہ فرٹیلائزڈ انڈے گنگا میں چھوڑے گئے۔

مرکز نے اطلاع دی کہ تقریباً 9.4 لاکھ ہیچری سے تیار کردہ اسپان چھوڑے گئے۔ مچھلی کی ٹیگنگ، نگرانی اور منتقلی کے مطالعہ کئے گئے ۔ مصنوعی نسلی افزائش اور ذخیرہ بڑھانے جیسی تکنیکیں استعمال کی گئیں۔ تحقیقی مرکز کے مطابق، 2023 سے 2025 تک نگرانی کی مدت کے دوران چھوڑی گئی ہلسا کو مرزا پور تک اوپر کی طرف بڑھتے ہوئے درج کیا گیا۔ اب، چندولی ضلع میں دو ہلسا ملنے سے اس کے تاریخی نقل مکانی کے علاقے کی بحالی کے آثار کو مزید تقویت ملی ہے۔ دونوں مچھلیوں کا مجموعی وزن 740 گرام بتایا گیا ہے۔

ت قابل غور ہے کہ ہلسا ایک حساس ہجرت کرنے والی نسل ہے۔ لہٰذا، اوپری گنگا میں اس کی موجودگی کو پانی کے رابطے، رہائش کے معیار اور دریا میں ماحولیاتی حیثیت کو بہتر بنانے کا ایک اہم حیاتیاتی اشارہ سمجھا جا رہا ہے۔

آئی سی اے آر -سی آئی ایف آر آئی کے ڈائریکٹر ڈاکٹر پردیپ ڈے نے کہا کہ ماہی گیری کے وسائل کی بحالی کو ایک جامع ماحولیاتی بحالی اور پائیدار معاش کا حصہ سمجھا جانا چاہیے، جس کے لیے مچھلیوں کی ہجرت ، دریائی رہائش، حیاتیاتی تنوع، پانی کے انتظام اور ماہی گیربرادریوں کی ضروریات کو مدنظر رکھنا ضروری ہے۔

ہلسا کی واپسی سے مچھلی کی دستیابی اور دریا پر منحصربرادریوں کے لیے روزی روٹی کے مواقع میں اضافہ متوقع ہے۔ یہ کامیابی گنگا میں دیگر مقامی اور نقل مکانی کرنے والے آبی انواع کی بحالی کے لیے بھی ایک نمونے کے طور پر کام کر سکتی ہے۔

ہندوستھان سماچار

ہندوستان سماچار / محمد شہزاد