سرینگر، 12 اگست (ہ س)۔ جموں و کشمیر پولیس نے ایک ٹھیکیدار کی شکایت پر بی جے پی پلوامہ کے ضلع صدر سید شوکت اندرابی کے خلاف فوجداری مقدمہ درج کیا ہے۔ شکایت کنندہ نے الزام عائد کیا ہے کہ اندرابی اس سے رقم کا مطالبہ کر رہے تھے، مجاز کام میں رکاوٹ ڈال رہے تھے اور اسے اور اس کے ملازمین کو ڈرا دھمکا رہے تھے۔ ایک پولیس اہلکار نے بتایا کہ یہ مقدمہ پولیس اسٹیشن پلوامہ میں ایف آئی آر نمبر 0145/2026 کے تحت درج کیا گیا ہے۔ ایف آئی آر بڈگام کے سوتھسو بی کے پورہ کے رہائشی محمد یاسین گنائی کی جانب سے دی گئی تحریری شکایت کی بنیاد پر درج کی گئی ہے۔

ایف آئی آر کے مطابق، محمد یاسین گنائی گرودوارہ پربندھک، برتھانہ سے متعلق کام کے لیے مٹی نکالنے اور اس کی نقل و حمل کا کام کررہے ہیں۔ شکایت کنندہ کا دعویٰ ہے کہ یہ کام مجاز حکام سے ضروری اجازت حاصل کرنے کے بعد شروع کیا گیا تھا۔ شکایت میں الزام لگایا گیا ہے کہ بی جے پی لیڈر نے بار بار ان کے کام میں مداخلت کی اور بغیر کسی رکاوٹ کے کام جاری رکھنے کے عوض ان سے 5 لاکھ روپے کا مطالبہ کیا۔ شکایت کنندہ نے مزید الزام عائد کیا ہے کہ بی جے پی لیڈر نے انہیں متعدد مرتبہ فون کیا اور دھمکیاں دیں۔ ان کے مطابق، مبینہ مالی مطالبے کے ساتھ قانونی کارروائی کی دھمکی بھی دی گئی۔

شکایت میں 8 اگست کے ایک واقعے کا بھی ذکر کیا گیا ہے۔ شکایت کنندہ کے مطابق، بی جے پی لیڈر تقریباً رات 10:50 بجے پاریگام میں واقع کام کی جگہ پر پہنچے اور اپنی نجی گاڑی مٹی کی نقل و حمل میں مصروف گاڑیوں کے سامنے کھڑی کردی، جس سے مبینہ طور پر گاڑیوں کی آمدورفت رک گئی۔ شکایت کنندہ کے مطابق، کارکنوں اور ڈرائیوروں نے رکاوٹ کی وجہ دریافت کی اور بتایا کہ ٹھیکیدار کے پاس کام کرنے کی سرکاری اجازت موجود ہے۔ الزام ہے کہ اس کے بعد بی جے پی لیڈر نے کارکنوں کی ویڈیو ریکارڈ کی اور ان پرغیر قانونی سرگرمیوں میں ملوث ہونے کا الزام عائد کیا۔

ایف آئی آر میں مزید الزام لگایا گیا ہے کہ ملزم نے بعض کارکنوں کو پبلک سیفٹی ایکٹ (پی ایس اے) کے تحت کارروائی کرنے کی دھمکی بھی دی۔ شکایت کنندہ کا دعویٰ ہے کہ پی ایس اے کے تحت حراست میں لیے جانے کے بار بار حوالوں کے ذریعے کارکنوں میں خوف پیدا کیا گیا اور مبینہ مالی مطالبات پورے کرنے کے لیے دباؤ ڈالا گیا۔

شکایت میں بی جے پی لیڈر کو مبینہ طور پر پہلے کی گئی ادائیگیوں کا بھی ذکر کیا گیا ہے۔ شکایت کنندہ کے مطابق، 21 نومبر 2025 کو 50 ہزار روپے ادا کیے گئے، جبکہ اگلے روز مزید 4 ہزار روپے کی ادائیگی کی گئی۔ شکایت کنندہ نے الزام لگایا ہے کہ یہ ادائیگیاں دباؤ کے تحت کی گئی تھیں اور رضاکارانہ نہیں تھیں۔ ان کا مزید دعویٰ ہے کہ مبینہ ادائیگیوں کے باوجود بعد میں مزید رقم کا مطالبہ کیا گیا۔ پولیس نے بھارتیہ نیایہ سنہتا (بی این ایس) کی متعلقہ دفعات کے تحت مقدمہ درج کیا ہے، جن میں غلط طریقے سے کام کرنے سے روکنے، بھتہ خوری اور مجرمانہ دھمکی سے متعلق دفعات شامل ہیں۔

شکایت کنندہ نے پولیس سے مبینہ مالی لین دین کی تصدیق کرنے کے ساتھ ساتھ ڈرائیوروں، کارکنوں اور دیگر عینی شاہدین کے بیانات ریکارڈ کرنے کی درخواست بھی کی ہے۔ ایک پولیس اہلکار نے بتایا کہ پولیس مٹی نکالنے اوراس کی نقل و حمل سے متعلق اجازت ناموں اور دستاویزات کی جانچ کر رہی ہے۔ اس کے علاوہ مبینہ مالی لین دین کے الزامات کی بھی تصدیق کی جا رہی ہے اور تفتیش کے دوران گواہوں کے بیانات ریکارڈ کیے جا رہے ہیں۔

دریں اثنا، بی جے پی جموں و کشمیر نے اپنے پلوامہ ضلع صدر سید شوکت اندرابی کے خلاف درج مقدمے اوران پرعائد الزامات کا نوٹس لیتے ہوئے انہیں پارٹی سے معطل کر دیا ہے۔ پارٹی نے معاملے کی تحقیقات کے لیے ایک انکوائری کمیٹی بھی تشکیل دی ہے۔ پارٹی کی جانب سے یہ اقدام اس وقت سامنے آیا ہے جب پولیس نے ٹھیکیدار کی شکایت پر ان کے خلاف مقدمہ درج کیا۔ تاہم، مقدمے میں عائد الزامات کی حتمی تصدیق تفتیش مکمل ہونے کے بعد ہی ہو سکے گی۔ہندوستھان سماچار

ہندوستان سماچار / Aftab Ahmad Mir