علی گڑھ, 12 اگست (ہ س)۔

علی گڑھ ضلع مجسٹریٹ اویناش کمار کی صدارت میں کلکٹریٹ میں سی ایم ڈیش بورڈ کے ذریعے محصولات اور ترقیاتی کاموں کی جائزہ میٹنگ ہوئی۔ بتایا گیا کہ جولائی میں علی گڑھ نے محصولات کے شعبے میں ریاست میں 30واں، ترقیاتی کاموں میں 42واں اور مجموعی طور پر 32واں مقام حاصل کیا۔

ضلع مجسٹریٹ نے مختلف محکموں کی پیش رفت کا جائزہ لیتے ہوئے افسران کو مقررہ اہداف بروقت مکمل کرنے اور مستحق افراد تک سرکاری منصوبوں کا فائدہ پہنچانے کی ہدایت دی۔ انہوں نے پردھان منتری کسم، مچھلی پالن اور پردھان منتری آواس یوجنا میں اہداف کی تکمیل پر خصوصی توجہ دینے کو کہا۔

ڈی ایم نے زرعی و باغبانی اسکیموں کی تشہیر، جل جیون مشن کے کاموں کی زمینی تصدیق اور مستحق طلبہ و معذور افراد کی فہرستیں اپ ڈیٹ کرنے کی بھی ہدایت دی۔ خراب کارکردگی پر اسٹامپ اور آبکاری محکمے کے متعلقہ افسران کو نوٹس جاری کرنے کے احکامات دیے گئے۔

انہوں نے واضح کیا کہ حکومت کی ترجیحی اسکیموں میں کسی بھی سطح پر لاپروائی برداشت نہیں کی جائے گی اور تمام اہداف بروقت و معیاری انداز میں مکمل کیے جائیں۔

---------------

ہندوستان سماچار / سید کامران علی گڑھ