نئی دہلی، 12 اگست(ہ س)۔
ملک میں مردم شماری-2027 کی تیاریاں تیزی سے جاری ہیں۔ مردم شماری کے پہلے مرحلے میں مکانات کی فہرست سازی اور رہائش گاہوں کی گنتی کا کام 31 ریاستوں اور مرکز کے زیر انتظام علاقوں میں مکمل ہو چکا ہے۔ باقی ریاستوں اور مرکز کے زیر انتظام علاقوں میں یہ کام ستمبر 2026 تک مکمل کر لیا جائے گا۔
وزیر مملکت برائے داخلہ نتیانند رائے نے بدھ کے روز راجیہ سبھا میں ایک سوال کے تحریری جواب میں یہ معلومات دی۔ انہوں نے بتایا کہ مردم شماری کے دوسرے مرحلے یعنی آبادی کی گنتی کی تیاریاں بھی مکمل کی جا رہی ہیں۔
بھارت کے گزٹ میں 3 اگست 2026 کو جاری کردہ نوٹیفکیشن کے مطابق لداخ اور جموں و کشمیر، ہماچل پردیش اور اتراکھنڈ کے برف باری والے علاقوں میں آبادی کی گنتی یکم ستمبر سے 30 ستمبر تک کرائی جائے گی۔ اس کے بعد یکم سے 5 اکتوبر تک دوبارہ جانچ اور اصلاح کا کام کیا جائے گا۔ان علاقوں کے لوگوں کو 17 اگست سے 31 اگست تک آن لائن خود مردم شماری میں معلومات درج کرنے کی سہولت بھی دی جائے گی۔ مردم شماری میں پہلی بار لوگوں کو یہ آن لائن سہولت فراہم کی جا رہی ہے۔
حکومت نے بتایا کہ مردم شماری کے پہلے مرحلے میں اعداد و شمار جمع کرنے کے لیے موبائل ایپ اور دیگر ڈیجیٹل پلیٹ فارم تیار کرکے استعمال میں لائے جا رہے ہیں۔ ان میں مردم شماری انتظام و نگرانی نظام (سی ایم ایم ایس) پورٹل بھی شامل ہے۔
مردم شماری کے دوسرے مرحلے کے لیے بھی ڈیجیٹل آلات تیار کیے جا چکے ہیں۔ اس سے مردم شماری کے دوران اعداد و شمار جمع کرنے اور ان کی نگرانی کے عمل کو مزید آسان اور مؤثر بنایا جا سکے گا۔پہلے مرحلے کے لیے ماسٹر ٹرینر، فیلڈ ٹرینر، مردم شماری ملازمین اور نگرانوں سمیت مردم شماری عملے کی تربیت ریاستوں اور مرکز کے زیر انتظام علاقوں کے تعاون سے مقررہ پروگرام کے مطابق مکمل کی جا چکی ہے یا جاری ہے۔
حکومت نے مردم شماری سے متعلق مختلف کاموں کے لیے اب تک ریاستوں اور مرکز کے زیر انتظام علاقوں کو 4,102 کروڑ روپے جاری کیے ہیں۔ اس رقم کا استعمال مردم شماری عملے کی تربیت، ملازمین کے انتظام، تکنیکی ڈھانچے، مردم شماری اہلکاروں کو اعزازیہ دینے اور دیگر ضروری کاموں میں کیا جا رہا ہے۔
مردم شماری-2027 میں ڈیجیٹل ٹیکنالوجی کے وسیع پیمانے پر استعمال اور پہلی بار آن لائن خود مردم شماری میں معلومات درج کرنے کی سہولت کے ذریعے اس عمل کو پہلے کے مقابلے میں زیادہ آسان اور سہل بنانے کی تیاری کی جا رہی ہے۔
ہندوستھان سماچار
ہندوستان سماچار / Mohammad Khan
