مزید افراد کے ملبے میں دبے ہونے کا خدشہ امدادی کارروائی تیزممبئی ، 12 اگست (ہ س)۔ ممبئی کے مضافاتی علاقے گھاٹ کوپر کے اشوک نگر میں بدھ کی علی الصبح پہاڑی کا ایک حصہ اچانک دھنس گیا اور اس کا ملبہ گوسیا چال کے چھ مکانات پر جاگرا۔ حادثے میں چھ افراد ہلاک ہوگئے، جبکہ مزید کئی افراد کے ملبے میں دبے ہونے کا خدشہ ظاہر کیا گیا ہے۔ فائر بریگیڈ، این ڈی آر ایف اور پولیس کی ٹیمیں موقع پر پہنچ کر راحت اور بچاؤ کے کام میں مصروف ہیں۔علاقائی پولیس ڈپٹی کمشنر کے مطابق حادثہ علی الصبح تقریباً سوا تین بجے پیش آیا۔ پہاڑی کا حصہ دھنسنے کے بعد بڑی مقدار میں ملبہ مکانات پر آ گرا، جس سے کئی گھر متاثر ہوئے۔ امدادی ٹیموں نے فوری طور پر ملبے میں پھنسے افراد کی تلاش شروع کی اور اب تک چھ افراد کی لاشیں نکالی جاچکی ہیں۔ حکام کے مطابق تقریباً چھ مزید افراد کے ملبے میں دبے ہونے کا خدشہ ہے، جس کے باعث تلاش اور بچاؤ کی کارروائی تیز کردی گئی ہے۔ممبئی کی میئر ریتو تاوڑے نے بتایا کہ ملبے کی زد میں کئی مکانات آئے ہیں۔ ان کے مطابق علاقے کے بعض مکانات کو پہلے ہی نوٹس جاری کیے گئے تھے۔ حادثے کے بعد پورے معاملے کا جائزہ لیا جائے گا اور متاثرہ علاقے میں مکانات کی حالت اور حفاظتی انتظامات کی جانچ کی جائے گی۔مضافاتی ضلع کلکٹر نے حادثے میں ہلاک ہونے والے افراد کے لواحقین کو فی خاندان تین لاکھ روپے کی مالی امداد دینے کا اعلان کیا ہے۔ انتظامیہ کے مطابق اس وقت اولین ترجیح ملبے میں پھنسے افراد کو محفوظ طریقے سے باہر نکالنا اور آس پاس موجود خطرناک مکانات کو محفوظ بنانا ہے۔امدادی ٹیمیں مسلسل ملبہ ہٹانے اور اس میں پھنسے افراد کی تلاش کا کام کررہی ہیں۔ پولیس اور انتظامیہ کی ٹیمیں علاقے کی صورتحال پر نظر رکھے ہوئے ہیں، جبکہ مزید جانی نقصان سے بچنے کے لیے خطرناک مقامات پر ضروری حفاظتی اقدامات بھی کیے جارہے ہیں۔

ہندوستھان سماچار

--------------------

ہندوستان سماچار / جاوید این اے