پلامو، 11 اگست (ہ س)۔ مشرقی وسطی ریلوے کے برکاکانا-سون نگر ریلوے سیکشن میں گڑھوا روڈ اور سگسگی ریلوے اسٹیشن کے درمیان سبنوا گاؤں کے قریب منگل کے روز کوئلے سے لدی ایک مال گاڑی کے 11 ڈبے پٹری سے اتر گئے۔ حادثے کے بعد ڈاؤن لائن پر ریلوے ٹریفک متاثر ہوا ہے۔ تاہم حادثے میں کسی کے زخمی یا ہلاک ہونے کی اطلاع نہیں ہے۔

ریلوے سے موصولہ اطلاعات کے مطابق مال گاڑی برکاکانا سے کوئلہ لے کر سون نگر جا رہی تھی۔ گڑھوا روڈ اسٹیشن سے گزرنے کے بعد سگسگی اسٹیشن کی طرف جاتے ہوئے گراسِم انڈسٹری کے قریب سبنوا گاؤں میں ریورس ایبل لائن پر مال گاڑی کے 11 ڈبے پٹری سے اتر گئے۔

حادثے کی اطلاع ملتے ہی ریلوے کے تکنیکی ماہرین اور انجینئرنگ ڈپارٹمنٹ کی ٹیم موقع پر پہنچ گئی اور امدادی و بحالی کا کام شروع کر دیا۔ متاثرہ ڈبوں کو ہٹانے اور ریلوے ٹریک کی مرمت کرکے ٹرینوں کی آمدورفت جلد از جلد بحال کرنے کی کوشش کی جا رہی ہے۔

ڈالٹن گنج کے ٹریفک انسپکٹر انل کمار تیواری نے حادثے کی تصدیق کی ہے۔ انہوں نے بتایا کہ اپ اور ڈاؤن کی مرکزی ریلوے لائنوں کو کوئی نقصان نہیں پہنچا ہے۔ تاہم ڈاؤن لائن سے کچھ فاصلے پر مال گاڑی کے چند ڈبے جھکے ہوئے ہیں۔ دوسری ٹرینوں سے ٹکرانے کے خدشے کے پیش نظر فی الحال ٹرینوں کی آمدورفت کے بارے میں حتمی فیصلہ نہیں کیا گیا ہے۔

ریلوے انتظامیہ نے حادثے کی تحقیقات شروع کر دی ہیں۔ مال گاڑی کے پٹری سے اترنے کی اصل وجہ تحقیقات مکمل ہونے کے بعد ہی سامنے آ سکے گی۔ حادثے کی وجہ سے ریلوے ٹریفک متاثر ہونے کے ساتھ ساتھ ریلوے کو مالی نقصان پہنچنے کی بات بھی سامنے آئی ہے۔

ہندوستھان سماچار

---------------

ہندوستان سماچار / عبدالواحد