لوک سبھا اسپیکر، وزیر داخلہ اور بی جے پی صدر نے مجاہد آزادی اور عظیم انقلابی خودی رام بوس کے یوم شہادت پر خراج عقیدت پیش کیا
نئی دہلی، 11 اگست (ہ س)۔ لوک سبھا اسپیکر اوم برلا، مرکزی وزیر داخلہ و تعاون امت شاہ اور بھارتیہ جنتا پارٹی (بی جے پی) کے قومی صدر نتن نوین سمیت کئی رہنماوں نے منگل کو امر انقلابی شہید خودی رام بوس کے یومِ شہادت پر انہیں خراج عقیدت پیش کیا۔ اوم برلا نے ایکس پر لکھا، ’’امر انقلابی شہید خودی رام بوس کے یومِ شہادت پر انہیں عاجزانہ خراجِ عقیدت اور کوٹی کوٹی نمن۔ وطن عزیز کے لیے ہنستے ہنستے اپنی جان قربان کرنے والے اس بہادر بیٹے کا ایثار اور قربانی ہمیشہ ہمارے قومی شعور کو بیدار کرتی رہے گی۔‘‘
امت شاہ نے کہا کہ مادر ہند کو غلامی کی زنجیروں سے آزاد کرانے کے لیے خودی رام بوس نے کم عمری میں ہی مسلح انقلاب کا اعلان کیا اور اپنی ہمت، شجاعت و ایثار سے برطانوی سلطنت کی بنیادیں ہلا دیں۔ محض 18 سال کی عمر میں ہنستے ہنستے پھانسی کا پھندا گلے لگانے والے خودی رام بوس نے حب الوطنی اور اعلیٰ ترین قربانی کی ایسی لازوال داستان رقم کی، جو صدیوں تک ملک کے نوجوانوں میں بہادری، خودداری اور قومی خدمت کی ترغیب کا ذریعہ بنی رہے گی۔
نتن نوین نے کہا کہ ان کی بے خوف شخصیت اور اٹل عزم آج بھی نوجوانوں کے لیے مشعلِ راہ ہے۔ حب الوطنی، ہمت اور عظیم ترین قربانی سے بھرپور ان کی زندگی آج بھی سبھی کو وطن کی خدمت اور قوم کے تئیں سچی لگن کی ترغیب دیتی ہے۔
وزیر دفاع راج ناتھ سنگھ نے کہا کہ ہندوستان کو غلامی کی زنجیروں سے آزاد کرانے کے لیے اپنی زندگی کی سب سے بڑی قربانی دینے والے خودی رام بوس کی بے مثال ہمت، غیر متزلزل حب الوطنی اور قوم کے تئیں لگن ہندوستانی تحریک آزادی کی تاریخ میں ہمیشہ یاد رکھی جائے گی۔ اتنی کم عمری میں انہوں نے جس بے باکی اور مضبوط ارادے کا مظاہرہ کیا، وہ آنے والی نسلوں کے لیے حب الوطنی اور ایثار کا سرچشمہ ہے۔
مرکزی وزیر زراعت و کسان بہبود شیوراج سنگھ چوہان نے کہا کہ وطن عزیز کی خدمت کے لیے وقف آپ کی زندگی اور پرجوش خیالات ہمیشہ نوجوانوں کو قوم کی خدمت کی ترغیب دیتے رہیں گے۔
مرکزی وزیر ٹیکسٹائل گری راج سنگھ نے کہا کہ کم عمری میں ملک کی آزادی کے لیے اپنی جان کا نذرانہ پیش کرنے والے امر شہید کی ہمت، لگن اور حب الوطنی اہل ان وطن کو ہمیشہ متاثر کرتی رہے گی۔
ہندوستھان سماچار
---------------
ہندوستان سماچار / انظر حسن
