شملہ، 11 اگست (ہ س)۔ ہماچل پردیش میں کلو صدر سے کانگریس کے رکن اسمبلی سندر سنگھ ٹھاکر کا وزیر بننا تقریباً طے مانا جا رہا ہے۔ وزیر اعلیٰ سکھویندر سنگھ سکھو نے منگل کو شملہ میں کہا کہ ریاست میں جلد کابینہ کی توسیع کی جائے گی اور ہائی کمان کی اجازت ملتے ہی اس پر عمل ہوگا۔ سندر سنگھ ٹھاکر کے بارے میں وزیر اعلیٰ نے کہا کہ وہ کسی بھی وقت وزیر کے عہدے کا حلف لے سکتے ہیں۔ ان کے اس بیان کے بعد ٹھاکر کے وزیر بننے کی قیاس آرائیوں کو تقریباً ختم سمجھا جا رہا ہے۔انہوں نے کہا کہ ہماچل کانگریس کی سیاسی امور کی کمیٹی (پی اے سی) کی میٹنگ ہونی ہے، تاہم اس سے پہلے بھی سندر سنگھ ٹھاکر کو وزیر کے عہدے کا حلف دلایا جا سکتا ہے۔اس وقت وزیر اعلیٰ اور نائب وزیر اعلیٰ سمیت ریاستی کابینہ میں 11 وزرا ہیں، جبکہ وزیر کا ایک عہدہ کافی عرصے سے خالی ہے۔ سکھو حکومت میں منڈی، کلو، لاہول اسپیتی اور چمبہ اضلاع کو کابینہ میں نمائندگی نہیں ملی ہے۔ چمبہ کو اسمبلی اسپیکر کا عہدہ حاصل ہے۔ایسے میں منڈی لوک سبھا حلقے سے وابستہ کلو کو کابینہ میں نمائندگی دے کر کانگریس علاقائی توازن قائم کرنے کی کوشش کر سکتی ہے۔ منڈی لوک سبھا اور اسمبلی انتخابات میں کانگریس کو یہاں شکست کا سامنا کرنا پڑا تھا اور اس وقت منڈی ضلع میں کانگریس کا صرف ایک رکن اسمبلی ہے۔پرینکا گاندھی کے ہماچل دورے کے بارے میںوزیراعلیٰ نے کہا کہ وہ 14 اگست کو ریاست کا دورہ کرسکتی ہیں۔ انہوں نے بتایا کہ دیوری اسکول کی تعمیر نو کے لیے پرینکا گاندھی نے ہدایات دی تھیں، تاہم فی الحال اس کے افتتاح کا کوئی پروگرام طے نہیں ہے۔قدرتی آفت کے دوران وزیر اعظم کی جانب سے اعلان کردہ 1,500 کروڑ روپے کی امداد کے بارے میں وزیر اعلیٰ نے کہا کہ یہ رقم اب تک ریاست کو نہیں ملی ہے۔ انہوں نے کہا کہ وہ وزیر اعظم کو خط لکھ کر امداد جاری کرنے کی درخواست کریں گے۔ ان کے مطابق مرکز سے امداد ملنے کی صورت میں حکومت کو ملازمین سے متعلق واجبات ادا کرنے میں مدد ملے گی۔

ہندوستھان سماچار

ہندوستان سماچار / Mohammad Khan