علی گڑھ, 11 اگست (ہ س)علی گڑھ مسلم یونیورسٹی کے سینئر سیکنڈری اسکول گرلز نے یومِ آزادی کی تقریبات کے تحت ‘ہمارا ورثہ، ہمارا مستقبل’ موضوع پر پوسٹر سازی اور نعرہ نویسی مقابلے کا اہتمام کیا، جس نے طلبہ کو اپنی فنکارانہ صلاحیتوں کے اظہار اور ہندوستان کے مالا مال ثقافتی ورثے، قومی شناخت اور آئندہ نسلوں کے لیے اس ورثے کو محفوظ رکھنے کی ذمہ داری پر غور کرنے کے لیے ایک تخلیقی پلیٹ فارم فراہم کیا۔ رنگا رنگ اور فکر انگیز تخلیقات میں جدت، تخیل اور حب الوطنی کے جذبے کی عکاسی ہوئی۔

اس میں بارہویں جماعت کی طالبہ انعمت خان نے پہلی پوزیشن ، جبکہ بارہویں جماعت کی حفصہ صابرین اور عمرین زینب نے بالترتیب دوسری اور تیسری پوزیشن حاصل کی۔ گیارہویں جماعت کی افرح عبداللہ اور بارہویں جماعت کی فاریہ مرتضیٰ کو حوصلہ افزائی انعامات دیے گئے۔

سینئر سیکنڈری اسکول گرلز کی پرنسپل ڈاکٹر نغمہ عرفان نے کہا کہ اس پروگرام نے طلبہ کو ہندوستان کے مالا مال ورثے کو ملک کے مستقبل کے حوالے سے اپنے وژن سے جوڑنے کی ترغیب دی۔

---------------

ہندوستان سماچار / سید کامران علی گڑھ