بہرائچ، 10 اگست (ہ س)۔ اترپردیش کے بہرائچ ضلع میں ہند-نیپال بین الاقوامی سرحد پر واقع حساس انٹیگریٹڈ چیک پوسٹ ( آئی سی پی ) روپئی ڈیہا کے سیکورٹی نظام میں نقب لگانے کا معاملہ سامنے آیا ہے۔ سیکورٹی جانچ سے بچنے کے لیے ڈرائیور نے آئی سی پی میں نصب بیریئر اور اسپیڈ گیٹ کو توڑ دیا اور تیز رفتاری سے گاڑی لے کر فرار ہوگیا۔ واقعہ کے بعد سیکورٹی اہلکاروں نے فوری مستعدی کا مظاہرہ کرتے ہوئے گاڑی کا پیچھا کیا اور تقریباً تین گھنٹے کی کوشش کے بعد ڈرائیور کو روپیئی ڈیہا تھانہ علاقہ میں پکڑ لیا گیا۔ واقعے کے دوران آئی سی پی احاطے میں کھڑی ایک ٹی وی ایس بائیک کو بھی نقصان پہنچا۔

آئی سی پی میں داخل ہونے کے لیے، گاڑیوں کو طے شدہ طریقہ کار کے مطابق اجازت لینا اور سیکورٹی جانچ سے گزرنا لازمی ہے ۔ بغیر اجازت کسی گاڑی کا احاطے میں داخل ہونا ممکن نہیں لگتا۔ ایسے میں سیکورٹی جانچ سے بچتے ہوئے ایک گاڑی کا بیریراور اسپیڈ گیٹ تک پہنچنا اور پھر دونوں سیکورٹی بیریکیڈ کو توڑ کر نکل جانا آئی سی پی کے سیکورٹی بندوبست پر سنگین سوال کھڑے کرتا ہے۔

آئی سی پی کے سیکورٹی اہلکار کی جانب سے روپیئی ڈیہا تھانے میں دی گئی شکایت کے مطابق ،یہ واقعہ 9 اگست کی شام کو پیش آیا۔ گاڑی نمبر یو پی 40 اے آر 7224 کا ڈرائیور سیکورٹی جانچ سے بچنے کی کوشش میں تیز رفتاری سے آئی سی پی کے احاطے میں داخل ہوا۔ بارڈر سیکورٹی فورس (ایس ایس بی ) کے سیکورٹی اہلکاروں اور ایل پی اے آئی کی نجی سیکورٹی ٹیم نے گاڑی کو روکنے کی کوشش کی، لیکن ڈرائیور نے گاڑی نہیں روکی۔

بتایا گیا ہے کہ ڈرائیور نے سب سے پہلے داخلی راستے پر لگے بیریکیڈ کو توڑ دیا۔ اس کے بعد ایل پی اے آئی کے سیکورٹی گارڈ نے اسپیڈ گیٹ بند کرکے گاڑی کو روکنے کی کوشش کی لیکن ڈرائیور نے تیز رفتاری سے گاڑی چلاتے ہوئے اسپیڈ گیٹ کو بھی توڑ دیا اور موقع سے فرار ہوگیا۔ واقعے کے دوران احاطے میں کھڑی ایک ٹی وی ایس بائیک کو بھی اس کی زد میں آنے کی وجہ سے نقصان پہنچا۔

روپئی ڈیہا پولیس اسٹیشن کے افسر ہریندر کمار مشرا نے پیر کو بتایا کہ ایک گاڑی، سیکورٹی جانچ سے بچنے کی کوششمیں تیز رفتاری سے بیریکیڈ کو توڑ کر چلی گئی۔ اطلاع ملنے پر گاڑی کو تحویل میں لے لیا گیا اور ڈرائیور اور مالک محمد سلام ساکن سٹی کوتوالی کو حراست میں لے کر پوچھ گچھ کی جا رہی ہے۔ گاڑی کی جانچ کی جا رہی ہے اور دیگر تحقیقات جاری ہیں۔

ہندوستھان سماچار

ہندوستان سماچار / محمد شہزاد