کولکاتا، 09 جولائی (ہ س): مغربی بنگال میں ترنمول کانگریس کے تین سابق راجیہ سبھا اراکین، سکھندو شیکھر رائے، سشمیتا دیو اور پرکاش چک برائک، جمعرات کو بھارتیہ جنتا پارٹی (بی جے پی) میں شامل ہو گئے۔ سالٹ لیک میں واقع ریاستی بی جے پی دفتر میں ریاستی صدر شمیک بھٹاچاریہ کی موجودگی میں تینوں رہنماؤں نے پارٹی کی رکنیت اختیار کی۔

یہ تینوں رہنما اس سے قبل ترنمول کانگریس کی جانب سے راجیہ سبھا کے رکن رہ چکے ہیں۔ ریاست میں اقتدار کی تبدیلی کے بعد انہوں نے راجیہ سبھا کی رکنیت سے استعفیٰ دے دیا تھا۔ اس کے بعد سے ان کے بی جے پی میں شامل ہونے کی قیاس آرائیاں جاری تھیں۔

ریاستی بی جے پی صدر شمیک بھٹاچاریہ نے کہا کہ وزیر اعظم نریندر مودی کی قیادت اور مغربی بنگال کی ترقی پر اعتماد کا اظہار کرتے ہوئے ان تینوں رہنماؤں نے بی جے پی میں شمولیت اختیار کی ہے۔ انہوں نے کہا کہ اب سکھندو شیکھر رائے، سشمیتا دیو اور پرکاش چک برائک کی شناخت صرف بی جے پی کارکنان کے طور پر ہوگی۔

شمیک بھٹاچاریہ نے یہ بھی کہا کہ جن لوگوں نے عوام کے ساتھ لوٹ مار اور بدعنوانی کی ہے، ان کے لیے بی جے پی کے دروازے بند ہیں۔ ادھر، ترنمول کانگریس میں حالیہ دنوں میں سامنے آنے والے اندرونی اختلافات کے درمیان ان رہنماؤں کی بی جے پی میں شمولیت کو سیاسی اعتبار سے اہم پیش رفت قرار دیا جا رہا ہے۔

ہندوستھان سماچار

---------------

ہندوستان سماچار / عبدالواحد