نئی دہلی، 09 جولائی (ہ س): عام آدمی پارٹی کے قومی کنوینر اور دہلی کے سابق وزیر اعلیٰ اروند کیجریوال نے پیٹرول اور ڈیزل کی قیمتوں کو لے کر مرکزی حکومت کو نشانہ بنایا۔ انہوں نے کہا کہ بین الاقوامی بازار میں خام تیل کی قیمتوں میں نمایاں کمی کے باوجود ملک میں پیٹرول کی قیمتیں کم نہیں کی گئیں۔ انہوں نے مطالبہ کیا کہ پیٹرول کی قیمت 82 روپے فی لیٹر مقرر کی جائے، جبکہ ای-20 پیٹرول اس سے بھی سستا ہونا چاہیے۔

اروند کیجریوال نے جمعرات کو پارٹی ہیڈکوارٹر میں منعقدہ پریس کانفرنس سے خطاب کرتے ہوئے کہا کہ بین الاقوامی بازار میں خام تیل کی قیمت پہلے 115 ڈالر فی بیرل تھی، جو اب کم ہو کر تقریباً 70 ڈالر فی بیرل رہ گئی ہے۔ اس کے باوجود ملک میں پہلے بھی پیٹرول کی قیمت تقریباً 102 روپے فی لیٹر تھی اور آج بھی ای-20 پیٹرول اسی قیمت پر فروخت کیا جا رہا ہے۔

کیجریوال نے دعویٰ کیا کہ موجودہ بین الاقوامی قیمت کے مطابق خام تیل کی لاگت تقریباً 42 روپے فی لیٹر بنتی ہے۔ اس میں ریفائننگ، آئل مارکیٹنگ کمپنیوں کا منافع، نقل و حمل کا خرچ، مرکزی ایکسائز ڈیوٹی، ریاستوں کا ویلیو ایڈیڈ ٹیکس (وی اے ٹی) اور ڈیلر کمیشن شامل کرنے کے بعد بھی پیٹرول کی قیمت تقریباً 82 روپے فی لیٹر ہونی چاہیے۔ انہوں نے کہا کہ اگر ای-20 پیٹرول فروخت کیا جا رہا ہے تو اس کی قیمت اس سے بھی کم، یعنی تقریباً 70 روپے فی لیٹر ہونی چاہیے۔

انہوں نے کہا کہ پیٹرول اور ڈیزل کی قیمتوں میں کمی سے نقل و حمل کی لاگت کم ہوگی، جس کا براہِ راست اثر مہنگائی پر پڑے گا اور ضروری اشیائے صرف کی قیمتیں بھی کم ہوں گی۔ اس سے عام لوگوں کو بڑی راحت ملے گی۔

کیجریوال نے کہا کہ سال 2014 سے اب تک کئی مرتبہ بین الاقوامی بازار میں خام تیل کی قیمتوں میں کمی آئی، لیکن اس کا فائدہ صارفین کو نہیں دیا گیا۔ اس کے برعکس تیل کمپنیوں نے گزشتہ چند برسوں میں ہزاروں کروڑ روپے کا منافع کمایا ہے۔

انہوں نے مرکزی حکومت سے مطالبہ کیا کہ عوامی مفاد میں فوری طور پر پیٹرول کی قیمت 82 روپے فی لیٹر مقرر کی جائے اور ای-20 پیٹرول و ڈیزل کی قیمتوں میں بھی مناسب کمی کی جائے تاکہ مہنگائی سے عوام کو راحت مل سکے۔

ہندوستھان سماچار

---------------

ہندوستان سماچار / عبدالواحد