نئی دہلی، 04 جولائی (ہ س): عالمی شطرنج فیڈریشن (فیڈے) کی ایتھکس اینڈ ڈسپلنری کمیشن نے سابق عالمی چیمپئن ولادیمیر کرامنک کے خلاف تادیبی کارروائی کرتے ہوئے ان پر دو سال کی پابندی عائد کر دی ہے۔ تاہم، اس میں سے آخری ایک سال کی پابندی تین سال کی پروبیشن (نگرانی) مدت کے لیے معطل رہے گی۔ اس کا مطلب یہ ہے کہ اگر کرامنک پروبیشن کے دوران کسی نئے ضابطہ خلاف ورزی کے مرتکب نہیں پائے جاتے، تو انہیں صرف ایک سال کی فعال پابندی کا سامنا کرنا ہوگا۔

یہ معاملہ فیڈے کے مینجمنٹ بورڈ اور فیڈے فیئر پلے کمیشن کی جانب سے درج کرائی گئی شکایات کے بعد شروع ہوا۔ شکایت میں الزام لگایا گیا تھا کہ کرامنک نے سوشل میڈیا اور عوامی پلیٹ فارمز پر گرینڈ ماسٹر ڈیوڈ ناوارا، مرحوم گرینڈ ماسٹر ڈینیئل ناروڈٹسکی سمیت کئی کھلاڑیوں پر مناسب ثبوت کے بغیر عوامی طور پر چیٹنگ کے الزامات عائد کیے۔

فیڈے کی ای ڈی سی نے تمام فریقوں کے دلائل اور شواہد کا جائزہ لینے کے بعد کرامنک کو فیڈے کے ایتھکس کوڈ اور ڈسپلنری کوڈ کی کئی دفعات کی خلاف ورزی کا قصوروار قرار دیا۔ کمیشن کے مطابق ان کے رویے سے کھلاڑیوں کی عزت و وقار، باوقار طرزِ عمل، سائبر بُلیئنگ، ذہنی ہراسانی، ایک مثالی کھلاڑی کی ذمہ داری اور فیئر پلے کمیشن کی تحقیقات میں تعاون نہ کرنے جیسے اصولوں کی خلاف ورزی ہوئی۔ اس کے علاوہ انہیں مناسب ثبوت کے بغیر عوامی سطح پر الزامات لگانے کا بھی قصوروار پایا گیا۔

تاہم، کمیشن نے دیانت داری، جوابدہی اور فیڈے کی ساکھ کو نقصان پہنچانے سے متعلق چند دیگر الزامات کو مناسب شواہد نہ ہونے کی وجہ سے مسترد کر دیا۔

اپنے فیصلے میں ای ڈی سی نے کہا کہ شطرنج میں چیٹنگ کے خلاف کارروائی فیڈے کی سب سے بڑی ترجیحات میں شامل ہے، لیکن ایسے الزامات صرف فیڈے کی خفیہ تحقیقات اور مضبوط شواہد کی بنیاد پر ہی لگائے جانے چاہئیں۔ ادارہ جاتی تصدیق کے بغیر کسی کھلاڑی پر عوامی طور پر شک ظاہر کرنا اس کی ساکھ اور ذہنی حالت کو نقصان پہنچا سکتا ہے۔

کمیشن نے یہ بھی واضح کیا کہ یہ فیصلہ کرامنک کے مبینہ اینٹی چیٹنگ طریقۂ کار کی سائنسی حیثیت پر نہیں، بلکہ الزامات کو عوامی طور پر پیش کرنے کے انداز اور اس کے شطرنج برادری پر پڑنے والے اثرات کی بنیاد پر دیا گیا ہے۔

پابندی کے علاوہ ای ڈی سی نے کرامنک کو یہ بھی ہدایت دی ہے کہ وہ 12 ماہ تک بغیر کسی معاوضے کے شطرنج برادری کے مفاد میں خدمات انجام دیں۔

فیڈے کے قواعد کے مطابق، کرامنک اس فیصلے کے خلاف 21 دن کے اندر فیڈے کی ایتھکس اینڈ ڈسپلنری کمیشن کی اپیل بنچ میں اپیل دائر کر سکتے ہیں۔

ہندوستھان سماچار

---------------

ہندوستان سماچار / عبدالواحد