ایم پی کے اندور میں پی ایم ای-بس سیوا کا آئی-14 روٹ پر ٹرائل شروع ہوا

اندور، 04 جولائی (ہ س)۔

مدھیہ پردیش کے اندور شہر میں مرکزی حکومت کے اہم منصوبے ’پی ایم ای-بس سیوا‘ کے تحت ہفتہ سے روٹ نمبر آئی-14 پر ٹرائل شروع ہو گیا ہے۔ اس روٹ پر 10 الیکٹرک بسوں کا تکنیکی اور تجارتی ٹرائل شروع کیا گیا ہے۔ یہ روٹ راو رنگواسا سے رنجیت ہنومان، راجواڑا اور بنگالی اسکوائر ہوتے ہوئے کناڑیہ بائی پاس تک ہے۔

حکومتِ ہند کے اس خصوصی منصوبے کے تحت اندور شہر کو کل 150 ہائی ٹیک الیکٹرک بسیں الاٹ کی گئی ہیں۔ 9 میٹر لمبائی کی یہ بسیں پوری طرح سے ایئر کنڈیشنڈ ہیں۔ گرین موبلٹی کو فروغ دینے کے لیے ان الیکٹرک بسوں کے آپریشن میں جدید ترین سہولیات کو شامل کیا جائے گا۔ اسی منصوبے کے تحت آج سے 10 بسوں کا ٹرائل رن شروع کیا گیا ہے۔ اسے مرحلہ وار طریقے سے رفتہ رفتہ بڑھا کر 150 بسوں تک کیا جائے گا۔ مسافروں کی سیکورٹی، سہولت اور ہموار آپریشن کو مدنظر رکھتے ہوئے ان بسوں میں عالمی معیار کی تکنیکوں کو شامل کیا گیا ہے۔ سیکورٹی سسٹم اور لائیو مانیٹرنگ کے لیے تمام بسوں میں سی سی ٹی وی کیمرے اور ’پینک بٹن‘ کی سہولت موجود ہے۔ ان بسوں میں لگے سی سی ٹی وی کیمروں کی فیڈ (فوٹیج) براہِ راست سینٹرل کنٹرول روم میں لائیو دیکھی جا سکے گی، جس سے سیکورٹی کے انتظامات کی مانیٹرنگ اور بھی بہتر ہوگی۔

انٹیلیجنٹ مینجمنٹ بسوں کے ریئل ٹائم آپریشن، ٹریکنگ اور شیڈولنگ کے لیے آئی ٹی ایم ایس تکنیک کا استعمال کیا جا رہا ہے۔ جس کی مانیٹرنگ اے آئی سی ٹی ایس ایل آفس اور نایتا منڈلا ڈپو میں واقع کمانڈ اینڈ کنٹرول سینٹر کے ذریعے کی جائے گی۔ ڈیجیٹل ٹکٹنگ، ڈیجیٹلائزیشن کے تئیں بیداری اور کیش لیس سفر کو فروغ دینے کے لیے بسوں میں ڈیجیٹل کرایہ وصولی کا نظام استعمال کیا جائے گا۔ ٹرانسپورٹ کے اس جدید ڈھانچے کو چلانے کے لیے روایتی ڈرائیور اور کنڈکٹر کی جگہ اب خصوصی طور پر تربیت یافتہ اور وردی پوش ’کوچ کیپٹن‘ اور ’ڈیجیٹل اسسٹنٹ‘ کا تقرر کیا جا رہا ہے۔ جو مسافروں کو آرام دہ، محفوظ اور عالمی معیار کے سفر کا تجربہ کرائیں گے۔

بسوں میں وہیل چیئر اسسٹنس سسٹم کی سہولت دستیاب ہے، جس سے معذور شہریوں کو بس میں چڑھنے اور اترنے میں آسانی اور سہولت ہوگی۔ مستقبل میں یہ ای-بسیں نہ صرف اندور شہر کے اندر چلیں گی، بلکہ آس پاس کے اہم قصبوں، گاوں اور بیرونی علاقوں (پیری-اربن ایریا) کو بھی اہم شہر سے جوڑیں گی۔ اس کے شروع ہونے سے شہر کے ساتھ ساتھ دیہی علاقوں کے عوام کو بھی ایک بہتر، کفایتی، محفوظ اور صاف ستھری پبلک ٹرانسپورٹ کی سہولت کا فائدہ ملے گا۔ انتظامیہ کی جانب سے شہریوں سے اپیل کی گئی ہے کہ وہ اس جدید ترین اور ماحول دوست بس سروس کا زیادہ سے زیادہ استعمال کر کے اس سہولت کا فائدہ اٹھائیں۔

ہندوستھان سماچار

ہندوستان سماچار / انظر حسن