تہران ،31جولائی(ہ س)۔ایرانی پارلیمنٹ کے اسپیکر محمد باقر قالیباف نے امریکا پر ایران کے شہری علاقوں کو نشانہ بنانے کا الزام عائد کرتے ہوئے کہا ہے کہ بے گناہ ایرانیوں کے خون کا حساب ضرور لیا جائے گا اور امریکا کو اپنے اقدامات کی قیمت چکانی ہوگی۔

قالیباف نے اپنے بیان میں کہا کہ امریکا مسلسل ایسے اقدامات کر رہا ہے جن سے خطے میں کشیدگی میں اضافہ ہو رہا ہے۔ ان کے بقول، میناب کے بعد امریکی کارروائیوں میں قیشم جزیرے کے رہائشی علاقوں کو بھی نشانہ بنایا گیا، جس کے نتیجے میں شہری آبادی خطرے سے دوچار ہوئی۔

انہوں نے کہا کہ جب بھی امریکا کو میدانِ جنگ میں ناکامی یا دباؤ کا سامنا ہوتا ہے، وہ عام شہریوں کو نشانہ بنا کر اپنی پالیسی آگے بڑھانے کی کوشش کرتا ہے۔ ان کا کہنا تھا کہ ایسے اقدامات بین الاقوامی قوانین اور انسانی اصولوں کے منافی ہیں اور ان پر عالمی برادری کو خاموش نہیں رہنا چاہیے۔ایرانی پارلیمنٹ کے اسپیکر نے کہا کہ ایران اپنی قومی خودمختاری اور عوام کے تحفظ کے لیے ہر ممکن اقدام کرے گا، جبکہ ملک کی مسلح افواج کسی بھی جارحیت کا مناسب اور مؤثر جواب دینے کی صلاحیت رکھتی ہیں۔یہ بیان ایسے وقت میں سامنے آیا ہے جب ایران اور امریکا کے درمیان کشیدگی بدستور برقرار ہے اور خطے میں حالیہ فوجی کارروائیوں کے بعد صورتحال مزید حساس ہو گئی ہے۔

واضح رہے کہ قالیباف کے الزامات پر خبر لکھے جانے تک امریکا کی جانب سے کوئی باضابطہ ردِعمل سامنے نہیں آیا تھا، جبکہ مذکورہ حملوں اور ان کی تفصیلات کی آزاد ذرائع سے مکمل تصدیق بھی تاحال نہیں ہو سکی ہے۔

ہندوستھان سماچار

ہندوستان سماچار / Mohammad Khan