ممبئی اور اطراف میں موسلادھار بارش سے معمولات زندگی متاثرممبئی، 3 جولائی (ہ س)۔ مہاراشٹر میں گزشتہ تین دن سے جاری موسلادھار بارش نے جمعہ کو ممبئی اور اس کے اطراف کے علاقوں میں معمولات زندگی بری طرح متاثر کر دیے۔ بھارتی محکمہ موسمیات نے پونے اور رائے گڑھ اضلاع کے لیے ریڈ الرٹ جبکہ ممبئی، تھانے، پالگھر سمیت کونکن، ودربھ اور وسطی مہاراشٹر کے مختلف علاقوں کے لیے شدید سے انتہائی شدید بارش کی وارننگ جاری کی ہے۔ ممکنہ ہنگامی صورتحال کے پیش نظر متعلقہ اضلاع میں تمام ایمرجنسی نظام کو مکمل طور پر الرٹ رکھا گیا ہے۔محکمہ موسمیات کے مطابق آئندہ چند روز تک ریاست بھر میں بارش کا سلسلہ جاری رہنے اور اس کی شدت میں مزید اضافے کا امکان ہے۔ خاص طور پر ممبئی، کونکن، ودربھ اور وسطی مہاراشٹر کے متعدد علاقوں میں شدید سے انتہائی شدید بارش متوقع ہے، جبکہ بعض مقامات پر انتہائی موسلادھار بارش بھی ہو سکتی ہے۔ محکمہ موسمیات نے پیش گوئی کی ہے کہ ممبئی میں آئندہ بہتر گھنٹوں کے دوران شدید سے انتہائی شدید بارش کا سلسلہ برقرار رہ سکتا ہے۔ بعض علاقوں میں صرف چوبیس گھنٹوں کے دوران دو سو ملی میٹر تک بارش ہونے کا امکان ظاہر کیا گیا ہے، جس کے پیش نظر شہریوں سے غیر ضروری سفر سے گریز اور احتیاطی تدابیر اختیار کرنے کی اپیل کی گئی ہے۔ ودربھ کے بلڈھانا، اکولہ اور امراوتی اضلاع کے لیے بھی شدید بارش اور آسمانی بجلی گرنے کی وارننگ جاری کی گئی ہے۔ اسی طرح سندھودرگ، نندوربار، دھولے، جلگاؤں، ناسک اور چھترپتی سمبھاجی نگر اضلاع کے لیے یلو الرٹ نافذ کیا گیا ہے، جبکہ اہلیہ نگر، جالنہ، بیڑ، پربھنی، واشم، وردھا، ناگپور، بھنڈارہ، گونڈیا، چندرپور اور گڑھ چرولی اضلاع میں گرج چمک کے ساتھ بارش کی پیش گوئی کی گئی ہے۔ممبئی میں مسلسل تیسرے روز بھی موسلادھار بارش کا سلسلہ جاری رہا۔ صبح سے شہر اور مضافاتی علاقوں میں وقفے وقفے سے شدید بارش ریکارڈ کی گئی۔ اندھیری، جوگیشوری، گوریگاؤں، ملاڈ، کاندیولی، بوریولی، دہیسر، ولے پارلے، سانتا کروز اور باندرہ سمیت متعدد علاقوں میں مسلسل بارش کے باعث نشیبی علاقوں میں پانی جمع ہونا شروع ہو گیا ہے، جس سے ٹریفک اور پبلک ٹرانسپورٹ متاثر ہونے کا خدشہ پیدا ہو گیا ہے۔ انتظامیہ نے شہریوں کو مشورہ دیا ہے کہ وہ انتہائی ضروری کام کے علاوہ گھروں سے باہر نہ نکلیں اور سرکاری ہدایات پر سختی سے عمل کریں۔ ممبئی میں اورنج الرٹ برقرار ہے جبکہ تھانے، پالگھر اور رائے گڑھ اضلاع میں بھی شدید بارش کی پیش گوئی کی گئی ہے۔محکمہ موسمیات کے مطابق ریاست کے دیگر حصوں میں بھی سات جولائی تک بارش کی شدت برقرار رہنے کا امکان ہے۔ گزشتہ چوبیس گھنٹوں کے دوران ممبئی میں مجموعی طور پر 204 ملی میٹر بارش ریکارڈ کی گئی۔ مختلف علاقوں میں ریکارڈ کی گئی بارش میں مالابار ہل میں 146 ملی میٹر، فورٹ میں 139 ملی میٹر، اندھیری میں 136 ملی میٹر، ورسووا میں 129 ملی میٹر، پوائی میں 124 ملی میٹر، مانخورد میں 118 ملی میٹر، بھانڈوپ میں 116 ملی میٹر اور ملنڈ میں 115 ملی میٹر بارش شامل ہے۔ہندوستھان سماچار

ہندوستان سماچار / جاوید این اے