جموں, 03 جولائی (ہ س)جموں پولیس نے شری امرناتھ یاترا کے دوران یاتری نیواس، جموں میں یاتری کی مبینہ ہلاکت سے متعلق سوشل میڈیا پر گردش کرنے والی خبروں اور ویڈیوز کو مکمل طور پر بے بنیاد قرار دیتے ہوئے مسترد کر دیا ہے۔جموں پولیس کی جانب سے جاری بیان میں کہا گیا کہ سوشل میڈیا پر بعض ریلس اور پوسٹس کے ذریعے یہ جھوٹا دعویٰ کیا جا رہا ہے کہ یاتری نیواس، جموں میں امرناتھ یاترا کے عقیدت مندوں کی اموات ہوئی ہیں، حالانکہ اس میں کوئی صداقت نہیں۔

پولیس نے واضح کیا کہ یاتری نیواس میں کسی بھی یاتری کی موت واقع نہیں ہوئی ہے اور تمام یاتری خیریت سے ہیں۔بیان میں مزید کہا گیا کہ جموں پولیس شری امرناتھ یاترا کے تمام یاتریوں کی حفاظت، سلامتی اور سہولت کو یقینی بنانے کے لیے پوری طرح پُرعزم ہے۔ پولیس نے عوام سے اپیل کی کہ وہ غیر مصدقہ خبروں اور افواہوں پر یقین نہ کریں اور ذمہ داری کا مظاہرہ کرتے ہوئے صرف مستند ذرائع سے جاری اطلاعات پر بھروسہ کریں۔

ہندوستھان سماچار

---------------

ہندوستان سماچار / محمد اصغر