اورنگ آباد ، 3 جولائی (ہ س) ۔ مہاراشٹر حکومت کی جانب سے اعلان کردہ پنیہ شلوک اہلیہ دیوی ہولکر کسان قرض معافی اسکیم 2026 کے تحت اورنگ آباد ضلع کے ایک لاکھ 80 ہزار 176 کسان قرض معافی کے اہل قرار پائے ہیں، جبکہ مجموعی طور پر 1632 کروڑ 12 لاکھ روپے کے زرعی قرض معاف کیے جائیں گے۔ یہ معلومات ضلع لیڈ بینک منیجر پریشیت موگھے نے فراہم کی۔انہوں نے بتایا کہ اسکیم سے مستفید ہونے والے بعض کسانوں کے آدھار کارڈ اب بھی بینک کھاتوں سے منسلک نہیں ہیں۔ ضلع میں مجموعی طور پر 712 کھاتہ دار ایسے ہیں جن کا آدھار لنک ہونا باقی ہے۔ متعلقہ کسانوں سے اپیل کی گئی ہے کہ وہ جلد از جلد اپنی متعلقہ بینک شاخ سے رابطہ کر کے آدھار کو بینک کھاتے سے منسلک کرائیں تاکہ انہیں اسکیم کا فائدہ حاصل کرنے میں کوئی دشواری پیش نہ آئے۔ انہوں نے کہا کہ اس اسکیم کے تحت قومیائے گئے بینکوں، کوآپریٹو بینکوں اور علاقائی دیہی بینکوں سے زرعی قرض حاصل کرنے والے اہل کسانوں کو شامل کیا گیا ہے۔ بینک وار اعداد و شمار کے مطابق اسٹیٹ بینک آف انڈیا، بینک آف مہاراشٹر، مہاراشٹر گرامین بینک اور ضلع سینٹرل کوآپریٹو بینک کے سب سے زیادہ کسان اس اسکیم سے فائدہ اٹھائیں گے۔حکومت کے مطابق یکم اپریل 2019 سے 31 مارچ 2025 کے درمیان قلیل مدتی فصلی قرض لینے والے اور 30 ستمبر 2025 تک واجب الادا قرض رکھنے والے کسانوں کو زیادہ سے زیادہ دو لاکھ روپے تک قرض معافی دی جائے گی۔ اس کے علاوہ جن کسانوں کے قرض کی ازسرنو تنظیم نو کی گئی ہے، وہ بھی اس اسکیم سے فائدہ اٹھانے کے اہل ہوں گے۔ حکام نے واضح کیا کہ جن کسانوں نے 2019 کی سابقہ قرض معافی اسکیم سے فائدہ حاصل کیا تھا، انہیں نئی اسکیم کے تحت زیادہ سے زیادہ 50 ہزار روپے تک ہی اضافی رعایت ملے گی۔ اسی طرح جن کسانوں پر دو لاکھ روپے سے زیادہ بقایا قرض ہے، انہیں پہلے اضافی رقم خود جمع کرانی ہوگی، جس کے بعد حکومت باقی واجب الادا رقم ادا کرے گی۔بینک انتظامیہ کے مطابق کسانوں کو اپنے حصے کی رقم جمع کرانے کے لیے 31 مارچ 2027 تک کی مہلت دی گئی ہے۔ متعلقہ تمام اعداد و شمار اور مستحقین کی تفصیلات اسکیم کے سرکاری پورٹل پر اپ لوڈ کر دی گئی ہیں تاکہ عمل درآمد میں شفافیت برقرار رکھی جا سکے۔ہندوستھان سماچار

--------------------

ہندوستان سماچار / جاوید این اے