شیوپوری، 03 جولائی (ہ س)۔ مدھیہ پردیش کے وزیر اعلیٰ ڈاکٹر موہن یادو اور مرکزی مواصلات اور شمال مشرقی خطے کی ترقی کے وزیر جیوترادتیہ سندھیا کا 5 جولائی کو شیوپوری کا دورہ مجوزہ ہے۔ شہر کے پولو گراونڈ میں منعقد ہونے والے شاندار پروگرام میں دونوں لیڈر تقریباً 2500 کروڑ روپے کی لاگت سے قائم ہونے والی آرڈیننس فیکٹری کا سنگِ بنیاد رکھیں گے۔ اس کے ساتھ ہی مختلف ترقیاتی کاموں کا افتتاح اور سنگِ بنیاد بھی رکھا جائے گا۔

پروگرام کی تیاریوں کے سلسلے میں ریاست کے وزیر توانائی اور شیوپوری ضلع کے انچارج وزیر پردیومن سنگھ تومر نے جمعہ کے روز جائزہ میٹنگ منعقد کی۔ میٹنگ میں کلکٹر اور ضلع مجسٹریٹ ارپت ورما کے ساتھ پروگرام کی مکمل خاکہ سازی پر تفصیلی تبادلۂ خیال کیا گیا۔ اسٹیج کے انتظامات، سیکورٹی، ٹریفک، پارکنگ اور دیگر انتظامات کا جائزہ لیتے ہوئے متعلقہ افسران کو ضروری ہدایات دی گئیں۔

انچارج وزیر نے کہا کہ پروگرام میں بڑی تعداد میں مستفیدین اور عام لوگوں کی آمد کے پیشِ نظر پینے کے پانی، صفائی ستھرائی، صحت کی خدمات اور ٹریفک کے بہتر انتظامات کو یقینی بنایا جائے۔ انہوں نے خاص طور پر ہدایات دیں کہ پروگرام کے مقام تک لوگوں کی آمد و رفت آسان رہے اور پارکنگ و ٹریفک مینجمنٹ پوری طرح منظم ہو۔

سیکورٹی اور امن و امان کے سلسلے میں انچارج وزیر نے پولیس سپرنٹنڈنٹ (ایس پی) یانگ چین ڈولکر بھوٹیا کے ساتھ تفصیلی گفتگو کی اور وی آئی پی پروٹوکول کے مطابق تمام سیکورٹی انتظامات مضبوط رکھنے کی ہدایت دی۔ ٹریفک انچارج نے روٹ پلان اور پارکنگ کے انتظامات کی تیاریوں کے بارے میں بھی معلومات پیش کیں۔

جائزہ میٹنگ میں شیوپوری کے رکن اسمبلی دیویندر جین، کولارس کے رکن اسمبلی مہیندر یادو، بی جے پی کے ضلع صدر جسونت جاٹو سمیت دیگر عوامی نمائندے اور ضلع انتظامیہ کے سینئر افسران موجود تھے۔ انچارج وزیر نے تمام محکموں کے درمیان بہتر تال میل کے ساتھ پروگرام کو کامیاب بنانے کی ہدایت دی۔

ہندوستھان سماچار

---------------

ہندوستان سماچار / انظر حسن