لکھنؤ، 20 جولائی (ہ س)۔ اتر پردیش کی راجدھانی لکھنؤ کے حضرت گنج واقع جواہر بھون میں پیر کی صبح تقریباً 10 بجے اچانک آگ لگ گئی۔ بھیانک آگ کے شعلے دیکھ کر دفتر پہنچے افسران اور ملازمین گھبرا گئے اور افراتفری مچ گئی۔ آگ کی اطلاع ملتے ہی فائر بریگیڈ کی ٹیم موقع پر پہنچ گئی اور آگ پر قابو پانے کی کوشش جاری ہے۔

جواہر بھون میں مختلف سرکاری محکموں کے دفاتر موجود ہیں۔ پیر کو تمام دفاتر کھلتے ہی ملازمین اپنی اپنی نشستوں پر پہنچے، اسی دوران عمارت کی چوتھی منزل پر آگ بھڑک اٹھی۔ چند ہی منٹوں میں آگ کا دھواں پورے احاطے میں پھیل گیا۔ اطلاع ملتے ہی فائر بریگیڈ کی کئی گاڑیاں موقع پر پہنچیں اور آگ بجھانے کی کارروائی میں مصروف ہو گئیں۔ حفاظتی اقدامات کے تحت عمارت میں موجود ملازمین اور دیگر افراد کو فائر فائٹرز نے باہر نکالا اور ریسکیو کارروائی تیزی سے جاری رکھی۔

حکومت سے متعلق اہم محکموں کے دفاتر ہونے کے باعث انتظامیہ اور فائر بریگیڈ کے افسران موقع پر موجود ہیں اور آگ پر قابو پانے کی کوششیں جاری ہیں۔ فی الحال آگ لگنے کی وجوہات کا پتہ نہیں چل سکا ہے۔ ابتدائی معلومات کے مطابق آگ کی وجہ سے فی الحال کوئی جانی نقصان نہیں ہوا ہے۔

ہندوستھان سماچار

---------------

ہندوستان سماچار / عبدالواحد