علی گڑھ, 20 جولائی (ہ س)۔

جواہر لعل نہرو میڈیکل کالج، علی گڑھ مسلم یونیورسٹی کے شعبہ پیتھالوجی کے ایم بی بی ایس طلبہ نے انڈین ایسوسی ایشن آف پیتھالوجسٹس اینڈ مائیکرو بایولوجسٹس (یوپی آئی اے پی ایم)، اترپردیش چیپٹر کے زیر اہتمام منعقدہ ادارہ جاتی سطح کے پیتھالوجی کوئز میں شاندار کارکردگی کا مظاہرہ کیا۔

اس میں فائزہ فرقان نے پہلا مقام حاصل کیا، جبکہ مریم احمد دوسرے اور اریان طارق تیسرے مقام پر رہے۔ تقریباً 25 سیکنڈ پروفیشنل ایم بی بی ایس طلبہ نے اس مقابلے میں حصہ لیا۔ اس کا مقصد تعلیمی امتیاز کو فروغ دینا، تصورات کی تفہیم کو مضبوط بنانا اور طب کے زیر تعلیم طلبہ کے درمیان صحت مند تعلیمی مسابقت کو فروغ دینا تھا۔

اپنی شاندار کارکردگی کی بدولت فائزہ فرقان اور مریم احمد نے اگست میں منعقد ہونے والے ریاستی سطح کے یو پی آئی اے پی ایم پیتھالوجی کوئز میں جے این میڈیکل کالج کی نمائندگی کرنے کے لیے کوالیفائی کر لیا ہے۔

شعبہ پیتھالوجی کی چیئرپرسن پروفیسر نشاط افروز نے کامیاب طلبہ کو مبارک باد پیش کی اور تمام طلبہ کی پرجوش شرکت کو سراہا۔ انہوں نے کہا کہ اس طرح کے تعلیمی مقابلے پیتھالوجی میں دلچسپی پیدا کرنے کے ساتھ ساتھ طلبہ کی تجزیاتی سوچ اور تشخیصی صلاحیتوں کو بھی بہتر بناتے ہیں۔ تمام شرکاء کو اسناد دی گئیں، جبکہ فاتحین کو ان کی کامیابی کے اعتراف میں یادگاری نشان پیش کیے گئے۔

شعبہ پیتھالوجی کی اسسٹنٹ پروفیسر اور کوئز کی کنوینر ڈاکٹر بشریٰ صدیقی نے کہا کہ اس طرح کے اقدامات طلبہ کو اپنے علم کا جائزہ لینے، طبی استدلال کی مہارتوں کو نکھارنے اور اعلیٰ سطح کے تعلیمی مقابلوں کی تیاری کے لیے قیمتی مواقع فراہم کرتے ہیں۔

---------------

ہندوستان سماچار / سید کامران علی گڑھ