نئی دہلی، 02 جولائی (ہ س): قومی انسانی حقوق کمیشن (این ایچ آر سی) نے اتر پردیش کے مظفر نگر ضلع میں ایک واقعہ کا از خود نوٹس لیا ہے، جہاں 12 بندھوا مزدوروں پر حملہ کیا گیا اور ڈیڑھ سال سے فیکٹری میں مناسب خوراک یا اجرت کے بغیر آدھی رات تک کام کرنے پر مجبور کیا گیا۔ کمیشن نے ریاست کے چیف سکریٹری اور پولیس کے ڈائریکٹر جنرل (ڈی جی پی) کو نوٹس جاری کرتے ہوئے دو ہفتوں کے اندر تفصیلی رپورٹ طلب کی ہے۔

میڈیا رپورٹس کے مطابق مظفر نگر ضلع کے منڈی گاؤں میں پیپر پلیٹ بنانے والی فیکٹری میں کام کرنے والے مزدوروں میں سے ایک فرار ہونے میں کامیاب ہوگیا اور اس نے ٹیٹاوی پولیس اسٹیشن میں شکایت درج کرائی۔ اس کے بعد دیگر مزدوروں کو بچا لیا گیا۔ طبی معائنے سے متعدد زخموں کا انکشاف ہوا، بشمول رگڑ، زخم، فریکچر، اور طویل جسمانی زیادتی کے آثار۔ پولیس کو معلوم ہوا ہے کہ ایک شخص کی موت ہوئی ہے، اور دیگر اموات کے امکان کے حوالے سے تحقیقات جاری ہیں۔

رپورٹس بتاتی ہیں کہ متاثرین کا تعلق مختلف ریاستوں سے تھا- جن میں اتر پردیش، بہار، اتراکھنڈ، راجستھان، ہریانہ، چھتیس گڑھ اور جھارکھنڈ شامل ہیں- جبکہ کچھ کا تعلق نیپال سے تھا۔ فیکٹری پہنچنے پر، ان کے موبائل فونز اور شناختی کارڈز کو مبینہ طور پر ضبط کر لیا گیا، جس سے انہیں اپنے اہل خانہ سے رابطہ کرنے سے روک دیا گیا۔ مزید برآں، پٹ بیل کتوں کو مزدوروں کو ڈرانے اور فرار ہونے سے روکنے کے لیے استعمال کیا جاتا تھا۔

کمیشن نے مظفر نگر کے ضلع مجسٹریٹ کو ہدایت دی ہے کہ وہ وزارت محنت اور روزگار کے معیاری آپریٹنگ طریقہ کار اور بندھوا مزدوری نظام ختم کرنے کے قانون 1976 کے مطابق معاملے کی چھان بین کرے۔ اسکے علاوہ ہدایات جاری کی گئی ہیں کہ ای-شرم کمیشن کے پورٹل پر مزدوروں کو فوری طور پر رجسٹرڈ کریں۔

ہندوستھان سماچار

---------------

ہندوستان سماچار / عبدالواحد