جوہر یونیورسٹی معاملے میں انتظامیہ متبادل راستہ اختیار کرے اور فیصلے پر نظرِ ثانی کرے: رحمت انصاریچندی گڑھ،19جولائی(ہ س)۔

مومن انصار سبھا، ریاست پنجاب کے ریاستی صدر رحمت انصاری نے مولانا محمد علی جوہر یونیورسٹی کے خلاف مبینہ انہدامی کارروائی اور جاری نوٹس کی سخت الفاظ میں مذمت کرتے ہوئے انتظامیہ سے مطالبہ کیا ہے کہ وہ اپنے فیصلے پر فوری نظرِ ثانی کرے اور تعلیمی ادارے کو نقصان پہنچانے کے بجائے قانونی و انتظامی حل تلاش کرے۔

رحمت انصاری نے اپنے بیان میں کہا کہ اگر عمارت کا نقشہ منظور نہ ہونے کا مسئلہ ہے تو یہ صرف جوہر یونیورسٹی تک محدود نہیں، بلکہ ملک کے مختلف حصوں میں بے شمار اسکول، کالج، یونیورسٹیاں اور دیگر عمارتیں ایسی ہیں جن کے نقشوں سے متعلق قانونی پیچیدگیاں موجود ہیں۔ انہوں نے دعویٰ کیا کہ صرف اس بنیاد پر کسی تعلیمی ادارے کو منہدم کرنے کا فیصلہ مناسب نہیں ہے۔انہوں نے کہا کہ انتظامیہ کے پاس متبادل راستے موجود ہیں، جیسے جرمانہ عائد کرنا، قانونی کارروائی کے ذریعے خامیوں کو دور کرانا یا دیگر آئینی و قانونی حل اختیار کرنا، لیکن ایک ایسے تعلیمی مرکز کو نقصان پہنچانا جہاں ہزاروں طلبہ تعلیم حاصل کرتے ہوں، کسی بھی اعتبار سے مناسب نہیں۔

رحمت انصاری نے کہا کہ تعلیمی ادارے قوم کا سرمایہ اور علم کے مراکز ہوتے ہیں۔ ایسے اداروں کے انہدام کی کارروائی نہ صرف ملک میں منفی پیغام دے گی بلکہ عالمی سطح پر بھی ہندوستان کی شبیہ متاثر ہوگی۔ انہوں نے کہا کہ اگر حکومت غیر قانونی یا غیر منظور شدہ اداروں کے خلاف کارروائی کرنا چاہتی ہے تو قانون کے مطابق ملک بھر میں موجود تمام ایسے اداروں کے ساتھ یکساں رویہ اختیار کیا جانا چاہیے، نہ کہ کسی ایک ادارے کو نشانہ بنایا جائے۔آخر میں انہوں نے انتظامیہ سے اپیل کی کہ وہ انصاف، قانون اور عوامی مفاد کو پیش نظر رکھتے ہوئے اپنے فیصلے پر نظرِ ثانی کرے، مسئلے کا پرامن اور قانونی حل نکالے، اور جوہر یونیورسٹی جیسے تعلیمی ادارے کو محفوظ رکھنے کے لیے مثبت اقدامات کرے۔

ہندوستھان سماچار

ہندوستان سماچار / Mohammad Khan