تہران ، 17 جولائی (ہ س)۔ ایران کی مسلح افواج کے سینئر ترجمان بریگیڈیئر جنرل ابوالفضل شکارچی نے جمعرات (مقامی وقت) کو خبردار کیا کہ اگر ملک کی فوجی تنصیبات پر حملہ کیا گیا تو تہران مغربی ایشیا میں امریکی فوجی اڈوں پر حملہ کرے گا۔ انہوں نے کہا کہ امریکی افواج کی موجودگی آبنائے ہرمز میں عدم تحفظ کی بنیادی وجہ ہے۔ یہ اطلاع ایران وائر، اسلامی جمہوریہ ایران براڈکاسٹنگ (آئی آر آئی بی) اور فاکس نیوز نے دی ہے۔

آئی آر آئی بی پر نشر ہونے والے ایک انٹرویو میں شکارچی نے کہا کہ امریکہ اور اسرائیل کو خطے میں موجود رہنے کا کوئی حق نہیں ہے۔ آبنائے ہرمز ایران کے کنٹرول میں محفوظ ہے۔ انہوں نے امریکی فوجی ناکہ بندی کو تزویراتی آبی گزرگاہ میں بڑھتی ہوئی کشیدگی کا ذمہ دار ٹھہرایا۔ شکارچی نے پڑوسی ممالک پر زور دیا کہ وہ ایران کے ساتھ تعاون کریں۔

ترجمان نے کہا کہ اگر نقصان پہنچا تو خطے میں تمام امریکی انفراسٹرکچر ہمارا ہدف ہوں گے۔ انہوں نے کہا کہ ہم دشمن پر طاقت سے حملہ کریں گے۔’ہم سالوں تک لڑ سکتے ہیں۔‘ان کے تبصرے ایران کے سب سے بڑے آپریشنل کمانڈ یونٹ، ایران کے خاتم الانبیاءسنٹرل ہیڈ کوارٹر کے ترجمان کی جانب سے اسی طرح کی وارننگ کے بعد سامنے آئے ہیں۔ یہ فوج اور سپاہ پاسداران انقلاب (آئی آر جی سی) کے درمیان فوجی کارروائیوں کو مربوط کرتا ہے۔

خاتم الانبیاءسینٹرل ہیڈ کوارٹر کے ایک بیان میں کہا گیا ہے کہ امریکہ کو کسی بھی صورت میں اس آبی گزرگاہ میں مداخلت کی اجازت نہیں دی جائے گی۔ بیان میں کہا گیا ہے کہ ’امریکہ نے ایران کے تیل اور گیس کی برآمد کے راستوں کو نشانہ بنایا ہے۔ اگر یہ سلسلہ جاری رہا تو خطے میں امریکہ اور اس کے اتحادیوں کے مفادات سے متعلق تمام بنیادی ڈھانچہ تباہ ہو جائے گا‘۔

یہ دھمکی ایک ایسے وقت میں سامنے آئی ہے جب امریکہ نے حال ہی میں ایران کی جنوبی بندرگاہوں کی بحری ناکہ بندی دوبارہ شروع کی ہے۔ جنوبی ایران میں فوجی اڈوں پر فضائی حملے تیز کر دیے گئے ہیں۔ امریکی صدر ڈونلڈ ٹرمپ نے خبردار کیا ہے کہ اگر کوئی معاہدہ نہ ہوا تو امریکی حملے ایران کے بنیادی ڈھانچے بشمول پاور پلانٹس اور پلوں تک پھیل جائیں گے۔ امریکی صدر ٹرمپ نے فاکس نیوز کو بتایا کہ ’اگلے ہفتے ایران کے لیے بہت برے ہونے والے ہیں۔ امریکا پاور پلانٹس اور پلوں پر حملہ کرے گا۔‘

ہندوستھان سماچار

ہندوستان سماچار / Mohammad Khan