نئی دہلی، 16 جولائی (ہ س)۔ سینٹرل بیورو آف انویسٹی گیشن (سی بی آئی) نے ڈاکٹر منوج بھگوان راو شرورے کی ضمانت کی درخواست کی مخالفت کی ہے۔۔ خصوصی جج اجے گپتا نے دونوں فریقوں کے دلائل سننے کے بعد درخواست ضمانت پر اپنا فیصلہ محفوظ کر لیا۔ درخواست ضمانت پر فیصلہ 22 جولائی کو سنایا جائے گا۔

شرورے کی ضمانت کی درخواست کی مخالفت کرتے ہوئے سی بی آئی نے کہا کہ اس جرم نے ملک کی شبیہ کو داغدار کیا اور لاکھوں طلباءکے مستقبل کو متاثر کیا۔ سی بی آئی کے وکیل نیتو سنگھ نے کہا کہ پیپر لیک ہونے کے نتیجے میں امتحان منسوخ ہو گیا، جس سے بہت سے طلباءکو کافی مشکلات کا سامنا کرنا پڑا اور اس کے نتیجے میں حکومت کو تقریباً 600 کروڑ روپے کا نقصان ہوا۔ پیپر لیک ہونے کے بعد کئی طلباءنے خودکشی بھی کر لی۔

سماعت کے دوران، شرورے کے وکیل نے دلیل دی کہ درخواست گزار کے خلاف الزامات صرف اور صرف شریک ملزم پرہلاد کلکرنی کے انکشافی بیان پر مبنی ہیں۔ صرف اس بیان کی بنیاد پر ان کے کردار کا تعین نہیں کیا جا سکتا۔ انہوں نے مزید کہا کہ شیرورے کے خلاف کوئی ٹھوس ثبوت نہیں ہے۔ انہوں نے مزید کہا کہ شیرورے کے فرار ہونے کا کوئی امکان نہیں ہے۔

نیٹ پیپر لیک معاملے میں اب تک 13 ملزمان کو گرفتار کیا گیا ہے۔ تمام ملزمان عدالتی تحویل میں ہیں۔ ایک سرکاری اہلکار کی شکایت پر 12 مئی کو اس معاملے میں ایف آئی آر درج کی گئی تھی۔ سی بی آئی نے تعزیرات ہند اور بدعنوانی کی روک تھام ایکٹ کی مختلف دفعات کے تحت ایف آئی آر درج کی ہے۔ سوالیہ پرچہ لیک ہونے کے الزامات کے بعد، 3 مئی کو ہونے والا نیٹکا امتحان منسوخ کر دیا گیا تھا اور 21 جون کو دوبارہ امتحان لیا گیا تھا۔ مرکزی حکومت نے اس معاملے کی سی بی آئی جانچ کا حکم دیا تھا۔

ہندوستھان سماچار

---------------

ہندوستان سماچار / عبدالسلام صدیقی