امراوتی، 13 جولائی (ہ س)۔ امراوتی ضلع کے پرتواڑہ تعلقہ کی کانڈلی گرام پنچایت حدود میں لیپٹوسپائروسیس کے ایک مشتبہ مریض کی نشاندہی ہوئی ہے، جس کے بعد محکمہ صحت حرکت میں آگیا ہے۔ مریض کے خون اور دیگر ضروری نمونے جمع کر لیے گئے ہیں، جبکہ اس کا علاج ناگپور کے آل انڈیا انسٹی ٹیوٹ آف میڈیکل سائنسز (ایمس) کے انتہائی نگہداشت یونٹ میں جاری ہے۔

محکمہ صحت کے مطابق کانڈلی گرام پنچایت علاقے میں مہمان کے طور پر آئے ایک کم عمر لڑکے کو کئی دنوں سے وقفے وقفے سے بخار آرہا تھا، جس پر اہل خانہ پہلے اسے مقامی اسپتال لے گئے۔ بعد ازاں اسے امراوتی منتقل کیا گیا اور پھر مزید علاج کے لیے ناگپور ایمس میں داخل کرایا گیا، جہاں ابتدائی جانچ کے بعد اس میں نایاب بیماری لیپٹوسپائروسیس ہونے کا شبہ ظاہر کیا گیا۔ فی الحال مریض کی حالت مستحکم بتائی جا رہی ہے۔

جس علاقے میں مریض چند روز تک مقیم رہا وہاں طویل عرصے سے گندگی، کھلے نالے اور بدبو کا مسئلہ برقرار ہے۔ نالیوں کا گندا پانی مسلسل سڑکوں پر بہتا رہتا ہے، لیکن متعلقہ گرام پنچایت اور ذمہ دار محکموں کی جانب سے اب تک کوئی مؤثر اقدامات نہیں کیے گئے۔ مقامی افراد کے مطابق گزشتہ چند دنوں سے اس علاقے میں نزلہ، کھانسی، بخار اور جسم درد میں مبتلا مریضوں کی تعداد بھی بڑھ رہی ہے۔

مشتبہ مریض سامنے آنے کے بعد محکمہ صحت نے فوری کارروائی کرتے ہوئے علاقے سے ضروری نمونے جمع کیے ہیں اور صورتحال پر نظر رکھی جا رہی ہے۔ تاہم مقامی شہریوں نے سوال اٹھایا ہے کہ گرام پنچایت صفائی اور نکاسی آب کے مسئلے کے مستقل حل کے لیے کب مؤثر اقدامات کرے گی۔ تعلقہ میڈیکل آفیسر ڈاکٹر لیکھیکا گاڈبیل نے بتایا کہ ابتدائی سطح پر جانچ جاری ہے۔ مریض کے خون اور پانی کے نمونے حاصل کیے گئے ہیں، جبکہ مریض کے قریبی رابطے میں آنے والے رشتہ داروں کو احتیاطی علاج بھی فراہم کیا جا رہا ہے۔ انہوں نے کہا کہ لیبارٹری رپورٹ موصول ہونے کے بعد آئندہ کی کارروائی کی جائے گی۔

ہندوستھان سماچار

--------------------

ہندوستان سماچار / جاوید این اے