امپھال، 12 جولائی (ہ س): منی پور کے کانگ پوکپی ضلع میں نامعلوم مسلح حملہ آوروں نے ایک کوکی کسان کو اس وقت گولی مار کر ہلاک کر دیا جب وہ جھوم کی کاشت میں مصروف تھا، حالانکہ اس کی بیوی کسی طرح بھاگ کر جان بچانے میں کامیاب ہو گئی۔ متوفی کی شناخت 53 سالہ ہولال سنگسیت کے طور پر ہوئی ہے جو گواجنگ گاوں کا رہنے والا تھا۔

مقامی ذرائع کے مطابق ہفتہ کی شام میاں بیوی اپنے جھوم کھیت میں کام کر رہے تھے کہ شام 4 بجے کے قریب نامعلوم حملہ آوروں نے ان پر اندھا دھند فائرنگ کر دی۔ گاوں والوں نے تقریباً 20 گولیوں کی آوازیں سنیں۔ شام تک جب جوڑا گھر نہیں لوٹا تو گاوں والوں نے تلاش شروع کی۔ تلاش کے دوران، ہولال سنگسیت کی لاش کھیت میں ملی جس پر گولیوں کے متعدد زخم تھے، جب کہ ان کی اہلیہ محفوظ مقام پر پہنچنے میں کامیاب ہوگئیں۔

کچھ مقامی تنظیموں اور گاوں والوں نے زیڈ یو ایف -کے اور این ایس سی این-آئی ایم کے عسکریت پسندوں پر حملہ کرنے کا شبہ ظاہر کیا ہے۔ تاہم، تحریر کے وقت تک، پولیس اور سیکیورٹی اداروں نے حملہ آوروں کی شناخت کی سرکاری طور پر تصدیق نہیں کی تھی۔

یہ واقعہ گواجنگ گاوں کے قریب تلاشی آپریشن کے دوران سیکورٹی فورسز کے کئی ہتھیار برآمد کرنے کے چند دن بعد پیش آیا۔ تامنگلونگ ضلع کی سرحد سے متصل اس حساس علاقے میں ہونے والی ہلاکتوں نے ایک بار پھر مقامی لوگوں میں سیکورٹی کے حوالے سے خدشات کو جنم دیا ہے۔ معاملے کی تحقیقات جاری ہے۔

یہ بات قابل غور ہے کہ منی پور میں 'جھوم' کی کاشت - جسے مقامی طور پر پام لو کے نام سے جانا جاتا ہے، ایک روایتی کاشتکاری کا طریقہ ہے جسے پہاڑی قبائل نے اپنایا ہے۔ اس میں جنگل سے ڈھکی ہوئی ڈھلوانوں کو صاف کرنا، پودوں کو جلانا اور اس کے بعد چاول، سبزیوں اور نقدی فصلوں کی مخلوط کاشت کے لیے بیج بونا شامل ہے۔

---------------

ہندوستان سماچار / عبدالسلام صدیقی