پونے ، 12 جولائی (ہ س)۔ پونے ضلع کے موشی علاقے میں تین منزلہ عمارت منہدم ہونے کے المناک حادثے کے بعد جاری 83 گھنٹے طویل ریسکیو آپریشن اتوار کی صبح مکمل کر لیا گیا۔ راحت و بچاؤ ٹیموں نے ملبے سے نو ملازمین کی لاشیں برآمد کر کے پوسٹ مارٹم کے لیے سرکاری اسپتال روانہ کر دیں، جبکہ نو افراد کو بحفاظت زندہ نکال لیا گیا۔ ریاستی حکومت نے جاں بحق ہونے والے ہر ملازم کے اہل خانہ کو مجموعی طور پر 40 لاکھ روپے مالی امداد دینے کا اعلان کیا ہے۔

یہ حادثہ 8 جولائی کو دوپہر تقریباً دو بجے پمپری چنچوڑ کے موشی علاقے میں واقع ویسٹ ٹو انرجی پروجیکٹ میں پیش آیا، جہاں جمع شدہ کچرے کے ڈھیر کے قریب قائم تین منزلہ انتظامی عمارت اچانک منہدم ہو گئی۔ حادثے کے وقت عمارت میں 23 ملازمین موجود تھے۔ عمارت گرنے کے آثار محسوس ہوتے ہی پانچ ملازمین فوری طور پر باہر نکلنے میں کامیاب ہوگئے، جبکہ 18 ملازمین ملبے تلے دب گئے۔

حادثے کی اطلاع ملتے ہی پمپری چنچوڑ میونسپل کارپوریشن، نیشنل ڈیزاسٹر ریسپانس فورس، اسٹیٹ ڈیزاسٹر ریسپانس فورس اور بھارتی فوج کی ٹیمیں موقع پر پہنچ گئیں اور بڑے پیمانے پر امدادی کارروائیاں شروع کی گئیں۔ مسلسل 83 گھنٹے تک جاری رہنے والے ریسکیو آپریشن کے بعد اتوار کی صبح نو افراد کی لاشیں برآمد کی گئیں، جبکہ نو ملازمین کو زندہ نکال کر قریبی اسپتالوں میں داخل کرایا گیا، جہاں ان کی حالت مستحکم بتائی جا رہی ہے۔

پمپری چنچوڑ میونسپل کارپوریشن کے کمشنر ڈاکٹر وجئے سوریہ ونشی نے میڈیا کو بتایا کہ جدید ترین مشینری، ڈاگ اسکواڈ، لائیو ڈیٹیکٹر، ساؤنڈ ڈیٹیکٹر، پوکلین مشینوں اور ڈمپروں کی مدد سے یہ وسیع پیمانے پر ریسکیو آپریشن مکمل کیا گیا۔ ملبے میں پھنسے افراد تک رسائی حاصل کرنے کے لیے کنکریٹ کے حصے کو خصوصی طریقے سے توڑ کر اندر جانے کی کارروائی بھی انجام دی گئی۔

انہوں نے بتایا کہ پورے آپریشن میں تقریباً 90 اہلکاروں نے حصہ لیا، تاہم تمام لاپتہ افراد کو زندہ بچانے کی کوششیں کامیاب نہ ہو سکیں۔ اس سانحے میں کئی خاندان اپنے عزیزوں سے محروم ہو گئے، جس سے علاقے میں غم کی فضا چھا گئی ہے۔ کمشنر ڈاکٹر وجئے سوریہ ونشی نے کہا کہ حادثے کی اعلیٰ سطحی تحقیقات جاری ہیں اور جو بھی اس واقعے کا ذمہ دار پایا جائے گا، اس کے خلاف سخت ترین کارروائی کی جائے گی۔

انہوں نے مزید بتایا کہ جاں بحق ملازمین کے اہل خانہ کو مجموعی طور پر 40 لاکھ روپے کی مالی امداد دی جائے گی، جس میں 5 لاکھ روپے ریاستی حکومت، 25 لاکھ روپے ویسٹ ٹو انرجی کمپنی اور 10 لاکھ روپے پمپری چنچوڑ میونسپل کارپوریشن کی جانب سے فراہم کیے جائیں گے۔ اس کے علاوہ ویسٹ ٹو انرجی کمپنی نے ہر متاثرہ خاندان کے ایک فرد کو ملازمت فراہم کرنے کا بھی اعلان کیا ہے۔

ہندوستھان سماچار

--------------------

ہندوستان سماچار / جاوید این اے