۔سوریہ پور میں نئی پولیس چوکی کا افتتاح

۔عصمت دری، قتل اور ہجومی تشدد، دونوں معاملوں میں بدمعاشوں کو سخت سزا دینے کی یقین دہانی

کولکاتا، 11 جولائی (ہ س)۔ مغربی بنگال کے وزیر اعلی شبھیندوادھیکاری نے ہفتہ کے روز جنوبی 24 پرگنہ کے باروئی پور میںواقع سوریہ پور کا دورہ کیا اور عصمت دری اور قتل کی گئی نابالغ لڑکی کے خاندان اور ہجومی تشدد میں مارے گئے نوجوان اندرجیت منڈل کے اہل خانہ سے ملاقات کی۔ وزیر اعلیٰ نے موب لنچنگ میں مارے گئے نوجوان کے اہل خانہ کو 25 لاکھ روپے کی مالی امداد کا چیک سونپا۔ انہوں نے نوجوان کے بڑے بھائی کے لیے بطور سوک والنٹیئرنوکری کا اعلان بھی کیا۔

وزیر اعلیٰ نے کہا کہ حکومت نابالغ متاثرہ کے خاندان کے ساتھ مضبوطی سے کھڑی ہے۔ تاہم انہوں نے یہ نہیں بتایا کہ خاندان کو کس قسم کی امداد فراہم کی گئی ہے۔ ان کا کہنا تھا کہ اگر اہل خانہ چاہیں گے تو معلومات عام کریں گے۔

دورے کے دوران وزیر اعلیٰ نے سوریہ پور میں ایک نئی پولیس چوکی کا بھی افتتاح کیا۔ انہوں نے بتایا کہ متاثرہ کے اہل خانہ نے ان سے منگل کو علاقے میں ایک پولیس چوکی قائم کرنے کی درخواست کی تھی اور محض چار دنوں کے اندر اسے شروع کر دیا گیا ہے۔ انہوں نے کہا کہ عصمت دری- قتل اور ہجومی تشدد کے دونوں معاملوں میں قصورواروں کو قانون کے مطابق سخت سزا دی جائے گی۔

وزیر اعلیٰ نے کہا کہ نابالغ لڑکی کے اہل خانہ نے وحشیانہ واقعہ کے بعد تحقیقات میں مکمل تعاون کیا ہے۔ انہوں نے کہا کہ پولیس نے شکایت میں نامزد چار افراد کو گرفتار کر لیا ہے۔ کچھ ملزمین بشیرہاٹ کے راستے بنگلہ دیش کی سرحد کی طرف بھاگ گئے، لیکن انہیں بھی پکڑ لیا گیا۔ باروئی پور ضلع پولیس کی کارروائی کی ستائش کرتے ہوئے انہوں نے کہا کہ سی آئی ڈی موب لنچنگ سے متعلق کیس کی تحقیقات کر رہی ہے، اس لیے وہ اس پر کوئی تبصرہ نہیں کریں گے۔

متاثرہ خاندان سے ملاقات کے بعد وزیر اعلیٰ اندرجیت منڈل کے گھر گئے۔ انہوں نے الزام لگایا کہ نوجوان کی شناخت دیکھ کر اس کا قتل کیا گیا۔ انہوں نے بتایا کہ 35 سالہ غیر شادی شدہ شخص کو باندھ کر مارا پیٹا گیا۔ وزیراعلیٰ نے دعویٰ کیا کہ اس واقعہ کے پیچھے سیاسی اشتعال انگیزی ہے۔ انہوں نے کہا کہ ویڈیو میں نظر آنے والے تمام ملزمان کو گرفتار کر لیا گیا ہے اور کچھ کو بکھالی اور دیگھہ سے بھی پکڑکر لایا گیا ہے۔

وزیر اعلیٰ نے کہا کہ ریاستی حکومت نے متوفی اندراجیت منڈل کے خاندان کی ذمہ داری اپنے اوپر لی ہے۔ خاندان کے گھر کی مرمت کروائی گئی ہے۔ متوفی کے والد کی بڑھاپے کی پنشن اور اس کی والدہ کے لیے اناپورنا یوجنا کے فوائد شروع کیے گئے ہیں۔ انہوں نے کہا کہ اندراجیت کو واپس نہیں لایا جا سکتا لیکن ان کے خاندان کو ہر ممکن مدد ملے گی اور مجرموں کو قانون کے تحت سخت سزا کا سامنا کرنا پڑے گا۔

وزیر اعلیٰ نے ریل بلاک کرنے اور توڑ پھوڑ کے واقعات پر بھی برہمی کا اظہار کیا۔ انہوں نے کہا کہ ریلوے املاک کو نقصان پہنچانے والے ملک دشمن ہیں اور انہیں سزا ملنی چاہیے۔ تاہم، انہوں نے پولیس کو یہ بھی ہدایت دی کہ وہ کسی بھی بے قصور کو غیر ضروری طور پر ہراساں نہ کریں۔ انہوں نے کہا کہ خوف صرف قاتلوں، عصمت دری کرنے والوں اور توڑ پھوڑ کرنے والوں کو ہونا چاہیے، عام لوگوں کو نہیں۔

ہندوستھان سماچار

ہندوستان سماچار / محمد شہزاد